bataie
/-tà-/
ba|ta|ie
[FO]
-
s.f.
scuintri armât jenfri dôs armadis, flotis di nâfs o avions, massime di grande impuartance:
undis bataiis dome sul Lusinç, centenârs di miârs di muarts par lâ indenant di cualchi metro (Francesc Placerean, Cuintristorie dal Friûl dal 1866 fint in dì di vuê);
Un pont fer te storie de Elade la bataie di Maratone, une glorie dute di Atenis, il segn di une vitorie pussibile intune vuere cuintri l'Imperi Persian (Adrian Cescje, Viaç aes origjins dal Logos)
Sin. combatiment
-
scuintri armât di proporzions ancje piçulis:
te bataie dal Topli Uork la prime che o vin vude il mês di Mai che à durât dute une zornade, a son muarts Copet, Furlan e il tenent Bucin che o sepi jo (Alan Brusini, La cartuline)
-
s.f.
[TS]
art
cuadri che al figure senis di combatiment
-
s.f.
[TS]
mus.
tai secui XVI e XVII, composizion polifoniche vocâl e strumentâl che e riclame moments di combatiment
-
s.f.
scombatiment fat par zûc:
alore Gjovanin al propon di sfidâ i Milanês a une bataie cui balons di arzile de Sfueime (Alan Brusini, Amîs come prime)
-
s.f.
scombatiment rituâl:
la cjane, magari di soròs, e il fenoli, che a son lis armis di benandants e strions tes bataiis des Cuatri Timporis (Sandri Carrozzo, Benandants e Terapeutis / Terapeutidis)
-
s.f.
(fig.)
barufe:
cumò si visave parfin di Doardo, chel dal borc disot che, dopo tantis bataiis e vê cirût tant di comandâ, la femine lu veve parât fûr di cjase e al jere finît cuissà dulà (Alan Brusini, Par stradis lungjis);
e jere sucedude une bataie di predis, un barufon trement, un barufon pe cuistion di Crist: Crist isal Diu o isal Om? (Francesc Placerean, La nestre storie)
-
s.f.
competizion:
une bataie a ritmi di musiche che e premiarà lis dôs propuestis miôr, e e darà ancje al public la pussibilitât di votâ la band preferide (Erika Adami, Poie europeane par «Suns»);
stant che e je un toc di grant valôr, pal solit la Regjine no jentre in bataie masse adore (Nilde Teresa Negro, Zuìn di scacs)
Sin. gare
, competizion
, scuintri
, lote1
-
s.f.
(fig.)
sfuarç par rivâ a un risultât, pal solit par un ben comun, che nol è facil e che al domande fature e sacrifici:
la bataie pal ricognossiment uficiâl dal furlan e jere une des motivazions che a vevin sburtât il grup fondadôr di Onde Furlane a dâsi adun (Max Mauro, Un Friûl difarent: i 90 mhz di Onde Furlane);
i rapresentants dai comitâts locâi a àn dut câs visât che si à di restâ in vuaite, parcè che no si pues considerâ za vinçude la bataie cuintri dal eletrodot aeri (Redazion Radio Onde Furlane, Cjargne eletrodot sot tiere);
pacifist convint, Evans si veve impegnât in diviersis bataiis no violentis in difese dal Gales (Carli Pup, Teritoris - Oms di Libertât)
Sin. lote1
, vuere
, campagne
Proverbis:
- là e va la tavaie, là e va la bataie