Dizionari de Lenghe Furlane

sflamiade  /-àd-/  sfla|mi|a|de  [AF]

1. s.f. manifestazion viamente e imburide dal fûc, cuntune flame ma che e dure pôc:  nol veve cjamò dite la ultime peraule che ti entre une sflamiade pal barcon, e el diau dut ros, cui voi come di sanc al si fâs dongje dal priôr (Dolfo Zorzut, El priôr dal convent di sant Valantin e el diau)
   Sin. vampade
   Var. sflameade
   
   1. lûs fuarte, improvise e di pocje durade:  e ven fûr dai nûi / une sflamiade di soreli (Eraldo Sgubin, Timp di Siarade)
      Sin. lamp¹ , lampade¹ , tarlup
   2. scjaldade dongje dal fûc:  "Se e podessis ricoverânus cheste gnot…" "Tal mio jet, puare femine! O ai tant ben i bleons nuviçâi nets di bugade: e il vuestri piçul lu metarìn cul gno; ma di cene, fie mê, no ai propri nie ce dâus. Intant faitsi dongje e piait une sflamiade […]" (Catarine Percude, La fuiace de Madone)
2. s.f. (fig.) manifestazion viamente, imburide e pal solit di pocje durade, di un cualsisei fenomen, compuartament, sintiment e v.i.:  da Udin la sflamiade [de rivolte de joibe grasse dal 1511] si slargjà par dut il Friûl (Redazion SFF, Il Strolic furlan pal 1935)
   Sin. flame¹ , sbroc , sclop , fûc , vampe