Dizionari de Lenghe Furlane

odôr  o|dôr  [FO]

1. s.m. sensazion olfative dade di une sostance:  la jerbe alte e dure che e nulive di mente salvadie e di camamilats, e e sierave il troi cun chel odôr (Maria Forte, Cjase di Dalban); tal aiar si sintive odôr di polente che al vignive fûr di cualchi cjase li dongje (Pieri Menis, Sul agâr); un odôr di sierât e di mufe di intosseâ (Pieri Somede dai Marcs, Pre Josef); cui che al mole [di fumâ] al recupere plasês pierdûts o dismenteâts: gjoldi il vêr gust dai aliments, sintî i odôrs e respirâ miôr (Guglielmo Pitzalis, Stude i spagnolets!)
   Sin. nulôr
   Cfr. puce , usme , flât
   
   1. (eufem.) sensazion olfative che no plâs:  ce odôr!; vierç il barcon, che al è odôr
      Sin. malodôr , peste¹ , puce , tuf
2. s.m. jerbe o altre sostance che si dopre par cusinâ:  il salvadi cusinât cun ducj i siei odôrs (Pierluigi Visintin, Friûl e furlans te Histoire de ma vie di Giacomo Casanova)
3. s.m. element che al fâs capî o previodi alc:  cuant che, par dut il paîs, si tache a puartà ator bandieris o ghirlandis di orâr, a tontonâ di glorie e di "urne dei forti" […], al pâr di sintî odôr di burlaç (Josef Marchet, Si tornial a cjariâ la suste?); "Sono novitâts?" "Eh! sì, grandis." "Odôr di matrimoni." (Pieri Somede dai Marcs, A la oselade)
   Sin. aiar¹ , puce , jenfrisegn

Polirematichis e espressions idiomatichis

• bon odôr loc.s.m.
• fâ odôr loc.v.

Proverbis:

• cui che al sta indaûr no i rivin i claps ma i rive l'odôr
• dulà che al è stât il fûc al reste odôr di brusadiç