Dizionari de Lenghe Furlane

mude  mu|de  [AF]

1. s.f. robe nete che si pues meti tal puest di ce che si à intor:  a cjase lôr miserie che alce da pês, cui bleons rots tant che i pîts a sbrissin fûr tai scartòs dal paion discusît, cu la sfilzade dute a bûs, cence une mude di blancjarie di cambiâsi (Pieri Somede dai Marcs, Une scarpute)
   Sin. cambi
   
   1. complès dai vistîts che si à intor:  lu viodeve simpri cun chê mude strussiade, ancje se la cjamese e jere monde e la golarine a puest (Maria Forte, La tiere di Lansing)
      Cfr. vistît¹ , vistiari , robe
   2. vistiari specific par une cierte ativitât:  mudis di lavôr e antiinfortunistiche (Redazion Lenghe.net, Publicitât in marilenghe, une aziende si fâs indenant); e somee la mude des poliziotis (Pieri Somede dai Marcs, Un pugn di moscjis)
      Sin. monture , vieste
   3. vistiari elegant, di fieste o di cerimonie:  "Bundì, chei siôrs! Puedio servîju in alc?" "O varessin voie di viodi di un tai par une mude." (Roberto Ongaro, Cretevierte)
      Sin. mude biele , mude buine , mude di fieste
2. s.f. [TS] zool. pierdite e rinovament periodic de piel, dal pêl o des plumis dai animâi:  lis gjalinis no fasin ûfs parcè che a son in mude (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
   
   1. cambiament formâl e struturâl di un animâl, soredut di un inset:  i cavalîrs a àn bisugne di clip cumò che a van in mude (Pieri Somede dai Marcs, Il prossim)
3. s.f. (fig.) aspiet esteriôr:  la Cjargne cu la biele stagjon e cambie mude (Marta Vezzi, Istât in mont)
4. s.f. intai timps passâts, puest li che si fermavisi par fâ polsâ o cambiâ i cjavai e li che si paiave lis tassis su ce che si puartave:  la mude di Vençon (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
   Sin. dazi
   
   1. tasse di paiâ pal passaç su ciertis stradis, puints, tunei e v.i.:  la Europe i à scancelât la mude des autostradis, che la Gjermanie e veve introdusût nome pai forescj (Barbara Cinausero, Vonde trafic di turiscj bande de Italie); al passe un oleodot. Vino di tacâ a meti une mude, un niderlec, une prediâl? (Enos Costantin, Vive la Patrie!)
5. s.f. passaç di funzions di cdn. a cdn. altri dopo di un timp stabilît:  strissâ fin li de cove, par dâi la mude a chel [soldât] che al veve fat il turni [di vuardie] prin di lui (Agnul di Spere, Cjalant la rive); lu cjariarin su la portantine che a vevin daûrsi e a scomençarin a vignî jù de mont dantsi la mude tal puartâ (Roberto Ongaro, Cretevierte)
   Sin. cambi
   Cfr. volte , viaç
   
   1. cui che al cjape il puest di cdn. altri intune funzion:  cuant che circa a trenta pas si vicina la muda de la vuardia clamarà: "Gewehr heraus!" (Antoni Brumat, Compendi di ducj i contegnos pal soldât comun tant in guarnigjon, come in cjamp devant il nemì, cul zurament e i articui di vuera)
6. s.f. trop di plui cjans impegnâts tal fâ une azion insiemi:  20 mudis di slitis dai curîrs postâi che a traspuartarin la antitossine difteriche par salvâ da la muart sigure centenârs di fruts (Redazion Lenghe.net, Di Fusine in Alaska in sleddog)

Polirematichis e espressions idiomatichis

• dâ la mude loc.v.
• dâsi di mude loc.v.
• dâsi la mude loc.v.

Proverbis:

• tantis mudis, tantis cjadudis