Dizionari de Lenghe Furlane

maridâsi  ma|ri|dâ|si  [FO]

1. v.pron.intr. unîsi in matrimoni, strenzi un leam di matrimoni:  Tilde e Nedo si maridarin inte glesie di Lauçane, adalt de culinute (Gianni Gregoricchio, Trê feminis); al è biel a maridâsi / e a cjoli cui che al plâs: / e di dì si fâs barufe / e di gnot si fâs la pâs (Popolâr, Al è biel a maridâsi)
   Sin. sposâsi
   
   1. deventâ il marît o la muîr di cdn.:  si jere spandude le vôs che Vigjute di Nani si maridave cun Nardon (Pieri Somede dai Marcs, Nardon e Vigjute di Nani); Min si jere maridât cuntune zovine dal so borc, e al veve metût in pîts une piçule farie (Franca Mainardis, Aiar di cjase)
      Sin. sposâsi
      Cfr. lâ a marît , sposâ , maridâ , cjoli
2. v.pron.intr. (fig.) formâ une cumbinazion, soredut une cumbinazion armoniche, ben induvinade:  la ricjece de narazion si maride cuntune altre tradizion "storiche" de nestre tiere: il scus (Redazion La Patrie dal Friûl, "Us conti une conte…")
   Sin. cumbinâsi , dâsi dongje

Proverbis:

• cui che al à di maridâsi a carnevâl, di avent che al prepari la cjamare
• cui che al à voie di mateâ che al compri un orloi o che si ledi a maridâ
• cui che al vûl stâ ben une dì, che al mangji ben; un mês, che si maridi; un an, che al maci il purcit; dute la vite, che al ledi predi
• cui che si maride al fâs ben, cui che no si maride al fâs miôr
• cui che si maride pai bêçs si picje pal cuel
• cui che si maride pe dote si picje pe gole
• denant di maridâsi al pâr che al mancji alc, daspò al mancje dut
• il maridâsi al sa di ram
• il maridâsi nol è di ducj
• il maridâsi nol è par ducj
• intant che la biele si cjale tal spieli, la brute si maride
• maridâsi sa di ram
• ni cuant che si maridisi ni cuant che si fâs batiâ no si è mai puars
• prin di maridâsi siet braçs e une lenghe, daspò maridadis siet lenghis e un braç
• si crôt che il maridâsi al sedi un zughet e invezit al è un intric maladet