Dizionari de Lenghe Furlane

mâr¹  mâr  [FO]

1. s.m. grande estension di aghe salade, ancje maiusc. tes denominazions gjeografichis:  arivâts là che la laguna si estint, senza il rapâr di chês isulis lungjis e incrosadis fra lôr, buliva il mâr plui furiôs, la aria no veva riten (Federigo Comelli, Il me paîs); il mâr in chel moment al veve une calme dolce, e il spieli de aghe, ingrispât dome di un flât, riflès sutîi, ma vîfs (Agnul di Spere, Int no consumade); sere, ducj insiemi, sentâts difûr in face al mâr che al veve la sô strade di lune (Maria Forte, Cjase di Dalban)
2. s.m. (fig.) grande estension:  un mâr vert di mediche, strafuei e grame (Franco Marchetta, Madalene); il puar «mûl» al pensà di jessi bessôl in chel mâr di lens neris (Pieri Menis, Tal bosc di Kebespok)
3. s.m. (fig.) grande cuantitât:  si jerin cjatâts cussì a cjaminâ pes viis de citât viere intal mieç di un mâr di int (Gianfranco Pellegrini, Fieste grande di fin Istât); un mâr di debits; un mâr di fastidis
   Sin. barcje , flum , mont¹ , sdrume , sglavin , slac , grum

Polirematichis e espressions idiomatichis

• cjan di mâr loc.s.m.
• lôf di mâr loc.s.m.
• mâl di mâr loc.s.m.
• puartâ aghe al mâr loc.v.
• sore il nivel dal mâr loc.av., loc.adi.inv.
• sul nivel dal mâr loc.av., loc.adi.inv.

Proverbis:

• bisugne inneâsi tal mâr grant, no je nancje braùre a inneâsi intune tace di aghe
• come il mâr al è il mont: cui che nol sa nadâ al va a fonts
• la aghe a va simpri al mâr
• laude il mâr e tenti a la tiere
• pericul in mâr, pericul in tiere, pericul te barele
• puartâ aghe al mâr
• se si à di inneâsi, miôr tal mâr che no tal cjaldîr
• si scjafoin plui tal bocâl che no tal mâr