Dizionari de Lenghe Furlane

invît  in|vît  [AF]

1. s.m. propueste fate a cdn. di jessi ospit, di vignî in visite, a mangjâ, a une fieste e v.i. o a fâ alc insiemi:  camerade ven vie, ti fâs l'invît / ma però, tu mi intints?, cu la parone / che sence je dut sarès dissavît (Ermes di Colorêt, I, 28); cjapâ mil compliments e invîts a balâ (Cristina Noacco, Faliscjis)
   
   1. sfuei o biliet o altri messaç par invidâ:  o voi a scrivi i invîts pe cerimonie (Roberto Ongaro, Il muc); mi à rivât a cjase un invît dai miei compagns di liceu. Un incuintri, in tratorie, par il trentesim de nestre licence (Gianni Gregoricchio, Trê feminis)
2. s.m. esortazion a compuartâsi intune cierte maniere:  chei esemplis, chês racomandazions, chei invîts, chei avîs, chei discors su la vanitât des cjossis dal mont, a àn creade une clime particolâr, a àn fats nassi pinsîrs che a disturbin… (Meni Ucel, Otavari a Madone); il paternalistic invît a cjapâ sù i libris, a tornâ a scuele (Graziano Urli, E parcè no une pidade tal cûl a Tolazzi?)
   Sin. racomandazion , esortazion , sburt
   
   1. (eufem.) domande, fate ancje cun autoritât o imposizion, di fâ alc:  l'invît a furnî justificazions su lis incongruencis cjatadis dai uficis de Agjenzie des Jentradis (Mariannina Rocco, Il reditometri)
      Sin. befel , comant , ordin , domande
3. s.m. (fig.) element, aspiet biel, che al fâs buine voie, che al fâs desiderâ:  la strade dal borc, cence plui invîts, si mostrave dissipade e strente tune maluserie che e veve cjapât la anime des robis (Maria Forte, Cjase di Dalban)
   Sin. bielece