incalmâ
in|cal|mâ
[CO, TS]
-
v.tr.
agr.
(ancje ass.)
meti un voli o une menade taiâts vie di une plante a cressi suntune altre plante, li che si prepare une sezion di pueste, di mût che la part che e cres e sedi plui fuarte cuintri di malatiis, bestiis o cundizions climatichis:
«Mari, cumò us mostri un svuisinâr che al è di incalmâ…» (Maria Forte, La tiere di Lansing);
al cognosseve nome plantis, rosis, pomârs e semencis. Al saveve incalmâ ogni cualitât di len; tant di Viarte che di Avost; e la sô vite le veve passade dute tal broili di Somede (Riedo Pup, I furlans e il mâr);
"O soi stât des cuatri a buinore fin cumò a cuinçâ e a incalmâ" (Alerame Petrozzi, Sghindadis)
Sin. calmâ2
-
v.tr.
(fig.)
fâ che alc, ancje imateriâl, al cjapi e al cressi dentri di alc altri, ancje inte societât o intune persone:
a incalmin, magari, ancje un butul di mafie e di camore «nazionâl» su la pivide de nestre puare milenarie culture «provinciâl» (Riedo Pup, I furlans e il terorisim);
dut chel che mi butave intune situazion incierte mi incalmave tes venis une sbisie teribile, e la mê gnervadure e molave a colp (Carlo Sgorlon, Il dolfin)
Sin. calmâ2
, insedâ
, inlidrisâ
-
v.tr.
(fig.)
penetrâ e fecondâ intun rapuart sessuâl:
e si vedarà prin dut lâ al contrari, / e lis fiestis faran ju dîs di vore, / la mari incalmarà, farà lu pari (Ermes di Colorêt, I, 152)
Cfr. semenâ
, implenâ
-
ancje in imprecazions e bramazions:
gjaul cji incalmi! (Angelo Arboit, Villotte Friulane)
Cfr. folâ
, trai
, puartâ
, buzarâ
, foti
, inculâ
, taconâ
-
v.tr.
med.
meti intun organisim un agjent che al cause une reazion imunitarie:
incalmâ la vacine (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
Sin. calmâ2
-
v.tr.
marang., artes., mec.
meti un toc intun spazi che lu cjape just:
incalmâ une cane di sclope (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
