formule
/fò-/
for|mu|le
[AF]
-
s.f.
espression rituâl, tipiche soredut de leç, de liturgjie, de magjie, che si dopre simpri compagne in ciertis situazions si pronunzie in mût precîs e invariât:
al restave dome di sintîlu a confermâ e di scrivi la formule finâl [dal testament] (Pieri Somede dai Marcs, Dure leç);
e fo proferide la formule dal zurament: rincje, pitincje robe dade, mai tornade… (Carlo Sgorlon, Il dolfin)
-
frase convenzionâl che si le dopre in espressions di cortesie, di ringraciament e v.i.:
se un zovin furlan al dopre la formule "mandi, cemût?" ma dopo al continue la conversazion par talian, isal un feveladôr furlanofon regolâr? (Dree Venier, «La lenghe furlane e sarà sparide in trê gjenerazions se no si fasin intervents decîs». L’alarme di Simone De Cia)
-
s.f.
let.
te poesie epiche, atribût o viers o secuence di viers che a tornin simpri compagns:
lis formulis a son une figure avonde lontane de poetiche di vuê (Sandri Carrozzo, Pierluigi Visintin, Jentrade de Odissee)
-
s.f.
chim., biol., med., mat.
rapresentazion schematiche o midiant di simbui di une sostance, di une relazion tra elements, di un procès, di une corelazion e v.i.:
aromai si pues "formulâ" cuistions "teologjichis" intal lengaç corint de sience (de fisiche teoriche) e ancje in tiermins algjebrics - o miôr di ecuazions - come che si pues viodi des 142 pagjinis di formulis matematichis che a sierin il libri di Tipler (Sergio Cecotti, Teologjie algjebriche)
-
s.f.
(fig.)
maniere particolâr di fâ alc o di otignî un risultât:
i moviments regjonaliscj di liberazion […] e rapresentin in Europe une gnove, fuarte e vitâl concezion de convivence pulitiche, […] une gnove formule di «europeisim» (Josef Marchet, Europe regjonaliste);
Lis scuelis a puedin sielzi e sperimentâ plui formulis organizativis e plui metodologjiis (Adrian Cescje, Memoriis di politiche linguistiche)
Sin. recipe
, ricete
, forme
, formât
, mût
, maniere