Dizionari de Lenghe Furlane

cumò  cu|mò  [FO]

1. av. in chest moment:  o 'nd ai fats mil di mistîrs, ma cumò o soi disocupât (Carlo Sgorlon, Prime di sere); "Par me", al zontà, "dal moment che la crisi e je passade, tu podaressis lâ vie ancje cumò… Tant o sai che no pierdarai il gust di tornâ a vioditi…" (Amedeo Giacomini, Tal ospedâl)
   Sin. dal moment , daurman
   
   1. (enf.) in chest moment tant che pont finâl di un alc:  e cumò si lamentin se dôs gjenerazions, cressudis tor il pulpit de lôr television, a àn imparade la lôr lezion (Riedo Pup, I furlans e la culumie)
   2. (enf.) in chest moment tant che pont di partence rispiet al futûr:  salacor le àn za cjatade [une femine copade] - al pensà - e cumò a tacaran a suspietâmi (Fabian Ros, Un piçul particolâr)
2. av. intun moment passât che al è pôc:  o soi stât cumò là de viele: e je ben disponude (Pieri Somede dai Marcs, Un testament); Gjovanin colôr di rose, / l'è passât par chi cumò; / lui mi à dit: "Mandi morose!" / jo i ai dit: "Ma lafè no!" (Popolâr, Gjovanin colôr di rose)
   Sin. maimodant , modant , cumò devant
3. av. intun moment che al sarà ca di pôc:  o ilustrarìn cumò in curt i aspiets dissiplinârs che a son stâts svilupâts in classe (Carlo Cecchini, Matteo Fogale, Une esperience di plurilinguisim inte didatiche de matematiche); la competizion e reste, a ogni mût, un mecanisim fondamentâl pe selezion naturâl, ancje se, come che o cirarai di ilustrâ cumò, ancjetant potent si mostrarà chel fondât su la cooperazion (Angelo Vianello, La evoluzion su la tiere. Une storie di competizion e cooperazion)
   Sin. cumò cumò , dal moment , daurman
4. av. intal presint intindût tant che dade di timp ancje lungje, ancje tant che fase storiche:  a Udin a 'nd jere un [di drâc] che al menaçave ducj chei che a passavin dongje de aghe dal lât che al jere une volte da pît dal cuel dal cjistiel, li che cumò al è Zardin Grant (Sandri Carrozzo, Friûl di Magance)
   Sin. al dì di vuê , aromai , in cumò , in dì di vuê , in presint , in vuê , in zornade di vuê , vuê , vuê dì
5. av. par indicâ intal passât contemporaneitât o un moment sucessîf a alc che al jere stât prime:  la tiere che ur jere stade imprometude in timp di vuere, cumò nissun ur e voleve plui dâ e cussì poiade la sclope e lâts in place a protestâ pe mancjance di lavôr si cjatavin denant i carabinîrs e i militârs che ur traevin intor (Carli Pup, La seconde Irlande)
   Sin. alore
6. av. (enf.) ancje cun valôr di coniunzion o par dâ plui enfasi, soredut a frasis esortativis, interogativis, esclamativis:  cumò scoltimi ben!; nancje lis aministrazions no son dutis compagnis: a 'nd è di miôr e di piês. E no stait domandâmi cumò cuale che e je la piês (Riedo Pup, I furlans e la patrie); ce âstu di bruntulâ cumò? (Maurizio Mattiuzza, Al mancje un re)
7. av. in corelazion cuntun altri "cumò", par pandi alternance:  savêso ce vite che al menave? Cumò sù pes montagnis dîs e dîs par burî fûr un cercifiu, mo cumò un viaç fin a Pordenon a proviodi une parussule; po l'Autun cun cualchi siôr a oselâ un rocul, e intant la prole che e vadi come che e vûl (Catarine Percude, L'oseladôr); no mancjava di cuant in cuant la blestema del vieli, cumò cuntra il vint, cumò cuntra la aga, cumò cuntra il fi che no veva colpa se gji trabalava la barcja, puartant a ogni sacodada fûr de lis mans del vieli il palet che fracjava nel pantan sota la aga (Federigo Comelli, Il me paîs)
   Sin. ce¹ , mo

Polirematichis e espressions idiomatichis

• cumò denant loc.av.
• cumò devant loc.av.
• cumò o dibot loc.av.
• di cumò indenant loc.av.
• di cumò indevant loc.av.
• o cumò o dibot loc.av.
• par cumò loc.av.

Proverbis:

• a Sant Nicolò il frêt al dîs: o soi ca cumò
• il diaul une volte al puartave e cumò che al è vieli al strissine