Dizionari de Lenghe Furlane

consacrâ  con|sa|crâ  [CO]

1. v.tr. fâ deventâ sacri cuntun rituâl, spec. dedicant a une divinitât, a un sant o a cdn. o a alc calcolât sacri:  l'è stât Popon che la à slargjada e alsada e piturada e che la à consacrada tal 1031 (Tita Brusin, La Basilica di Aquilea)
   Sin. avodâ , dedicâ , intitulâ , titulâ , ufrî
   
   1. (ancje ass.) tal rituâl cristian, fâ che il pan e il vin a deventin cuarp e sanc di Crist:  [la Madone] no veve podût dî messe e consacrâ il pan e il vin ma e veve scugnût rassegnâsi a cjapâ la comunion des mans di sant Zuan, l’apuestul preferît (Antoni Beline, La fabriche dai predis)
   2. dâ a cdn. une incarghe religjose o cun autoritât sacre:  Sant Pieri, dit e fat, lu consacrà Vescul e lu tornà a mandâ ad Aquilee (Dino Virgili, La aghe da pît la cleve)
      Sin. onzi¹ , ordenâ
2. v.tr. (fig.) dedicâ ad in plen:  e lôr, puarins, [i servidôrs] le metevin dute e a consacravin la lôr vite al siôr dal cjiscjel e a la sô famee (Riedo Pup, I furlans e il cjistiel)
   Sin. avodâ , dedicâ
3. v.tr. (fig.) fâ deventâ degn di onôr, rispiet e v.i.:  il curadôr dal Museu «Guggenheim» di New York i dedicà [a Afro Basaldella] une impuartante monografie critiche che lu consacrà definitivementri (Luca De Clara, Afro Basaldella)
4. v.tr. (fig.) fâ deventâ salt, concret, definitîf, acetât e v.i.:  il Sîscent al è dominât de figure di Ermes di Colorêt […]. Il secul seguitîf lu consacre tant che model di lenghe e di stîl (Cristina Cescutti, Leterature furlane)
   Sin. fissâ , stabilî