stabilî
sta|bi|lî
[FO]
-
v.tr.
decidi alc, spec. une norme, in maniere uficiâl e par che al duri:
nol veve ancjemò stabilît ben il so avignî (Maria Forte, Cjase di Dalban);
a son i parons dal vapôr che a stabilissin ce che al va contât e ce che al va tasût (Josef Marchet, Cuintristorie dal Friûl fin sot la Italie);
il dotôr Carli al veve stabilît di partî par un mesut di licence (Pieri Somede dai Marcs, Ta la ombrene de canoniche);
la Cjarte Costituzionâl de Republiche taliane, ancjemò frescje di ingjustri, e stabilìs un ordenament autonomistic pes regjons che a formin il Stât (Josef Marchet, …e la leç e je salve)
Sin. fissâ
, decidi
, ordenâ
, deliberâ1
, destinâ
-
v.tr.
osservâ e individuâ in maniere precise:
Noam Chomsky, insiemi a cualchi altri, al à dit une vore ben che no si pues stabilî diferencis sientifichis fra lenghis e dialets (Franc Fari, Il cjâf dai furlans);
il miedi legâl al varà ancje stabilide la ore dal decès (Fabian Ros, Un piçul particolâr)
Sin. definî
-
v.tr.
fâ che alc al sedi in vore, al funzioni, al esisti:
fondant Aquilee tal 181 i Romans a àn stabilît chenti la lôr paronance (Gian Carlo Menis, Storie dal popul furlan);
si è rivâts a stabilî une comunicazion cun malâts che si crodeve a fossin in stât vegjetatîf persistent ma che invezit a jerin in stât di cussience minime (Franc Fari, La evoluzion dal çurviel e de cussience tai vertebrâts)
-
v.tr.
[TS]
edil.
dâ sù la stabilidure sù pai mûrs:
par vie des malatiis contagjosis il guvier al à fat stabilî e sblancjâ cu la cjalcine ducj i mûrs (Josef Marchet, Lis predicjis dal muini);
a i domandà a la mari da comedâ la stanseata sot il puarti. Al batè il teraç, al slargjà il balcon, al stabilì pulît e al de di blanc (Novella Cantarutti, Torero)
Sin. disgresâ
, smaltâ
-
v.tr.
[TS]
artes.
rifinî la piel cuinçade cu la lunete