cognossût
co|gno|ssût
[FO]
-
p.pass.
viôt cognossi
, viôt cognossisi
-
adi., s.m.
che, cui che si sa cui che al è, che si è plui o mancul in confidence, cence rivâ a jessi amîs:
o podaressis lâ là jù, che no sês cognossûts, e spietâ che lis aghis si calmin (Roberto Ongaro, Il muc);
chel stâ distirât tal clip dai linzûi […] mi sabore fantasiis, ricuarts di fantatis cognossudis (Alan Brusini, Gian Paolo Linda, I forescj)
Sin. cognossint
, cognossince
-
adi.
che si sa, che si à imparât o vût pratiche o familiaritât o comprension e v.i.:
a pene che al jere jentrât, al veve olmât dulintor come persone che e torne sui lûcs di jê cognossûts e che e stente a rigjavânt la stesse atmosfere dal timp indaûr (Gianni Gregoricchio, Trê feminis);
la aplicazion dai criteris di coerence e di funzionalitât, se si ten cont des convenzions grafichis cognossudis, e permet di tirâ sù un sisteme grafic sempliç (Xavier Lamuela, La grafie furlane normalizade)
-
adi.
che si identifiche intune cierte maniere, che al à une cierte denominazion:
da cjâf de bande al jere un ciert Laurinç Marchet cognossût par Miôl, che al devi vê parintât vive inmò, là sù (Riedo Pup, Gran Dio benedite l'Italia);
in Scozie al esisteve un partît teritoriâl, l'Unionist Party, cognossût ancje come Scottish Unionist Party, aleât ma indipendent dal Partît conservadôr inglês (Sergio Cecotti, Il risultât eletorâl dai partîts di identitât teritoriâl - A case study: Scottish National Party)
-
adi.
che ducj o tancj a cognossin:
une mostre cun oparis di Supan, Tubaro, Anzil e altris autôrs cognossûts de piture furlane dal secul XX;
chê jenfri Strumîrs e Çambarlans e je dal sigûr la faide plui lungje, plui sanganose e plui cognossude, ma no je la uniche che si à vude in Friûl (Carli Pup, Il Friûl de Joibe Grasse dal 1511);
de famee des cruciferae a fasin part une vore di speciis spontaniis, plui o mancul cognossudis, che si puedin doprâ in cusine (Giorgio Pascoli, Il Litum: jerbis salvadiis te cusine);
vite e miracui di dut il borc, peteçs cognossûts o segrets (Pieri Menis, Sot il puarti)
Sin. ciert
, famôs
, garantît
, innomenât
, popolâr
, provât
, savût
, sperimentât
-
adi.
che ducj o tancj a san che al è vêr, che nol ven metût in discussion:
che l'assessôr al cjapàs mandulis e jere une robe cognossude
-
adi.
che ducj o tancj a doprin:
lis lenghis cognossudis di mancul di un milion di personis a son in pericul (Carli Morandin, Interviste a Alberto Felice De Toni);
il sisteme informatic pensât al lavore in maniere compatibile sui sistemis operatîfs plui cognossûts (Adrian Cescje, Presentazion dal GDBTF)
-
s.m.
filos.
dome tal sing., ce che si cognòs