Dizionari de Lenghe Furlane

vaî  va|î  [FO]

1. v.intr. mostrâ displasê, spavent, comozion o ancje gjonde o altris emozions fuartis mandant fûr lagrimis dai voi e sangloçant:  Tonin le cjalave e ancje lui al veve un grop sul stomi che i mancjave pôc a vaî (Pieri Menis, Si disarès che e je inventade); la int a scjampin tes cjasis, a clamin i fruts che a vain di pôre, si sierin dentri (Alan Brusini, Par stradis lungjis)
   Sin. cragnâ , cuarnassâ , fifâ , fricâ , fricotâ , fricuçâ , friculâ , jesolâ , rontâ , rontonâ , vaiuçâ , planzi , crazâ
   
   1. v.tr. vê e pandi displasê indreçât in particolâr a cdn. o a alc:  dopo spirât, al jere un afâr a viodilu distirât sot il baldachin dal so jet jenfri il coro dal rosari, la sô int che lu vaìvin (Alan Brusini, La fantasie de muart); a lis maris… no ur reste che vaîju, i lôr fîs… (Alviero Negro, Int di masnade)
   2. pronunziâ cun vôs di lament, lagrimant e sangloçant:  «Te rogamus, audi nos!» a vaìvin la int intor (Dino Virgili, La aghe da pît la cleve)
2. v.tr. (fig.) vê displasê par une pierdite, ancje cence pandilu cun lagrimis:  e jerin di chês plumis che nissun vaìve la lôr partence (Josef Marchet, Cuintristorie dal Friûl fin sot la Italie); Noaltris no vaìn la Austrie, dal sigûr; ma o vaìn la insipience dai liberadôrs che nus àn fat stâ une vore piês di prime (Josef Marchet, Cui nus liberaraial des liberazions?)
3. v.intr. lagrimâ par vie di sostancis che a dan fastidi ai voi:  sul fogolâr al ti vampave il fûc e al ti sparniçave intor co al si impensave cualchi glagn di fum di fâti vaî i voi (Dolfo Zorzut, No je plui vive)
   Sin. lagrimâ
4. v.intr. di animâi, lamentâsi o fâ un viers che al somee un lament:  al pâr che a vain i cjans di duta la vila, che Diu ju speli (Novella Cantarutti, I cjans di not)
   Sin. ciulâ , mugnâ , sgnaulâ , cainâ , vuicâ
5. v.intr. (fig.) mandâ fûr un licuit:  i cjâfs des vîts, par ordin che ju çoncjavi cu lis fuarpiis, mi vaìvin in man (Josef Marchet, Lis predicjis dal muini)

Polirematichis e espressions idiomatichis

• vaî il cûr loc.v.
• vaî il muart loc.v.

Proverbis:

• a lâ a cjase cence nuie, la cjase e vai
• a lâ a marît a vuelin doi cjaçuts: un di fridi e un di vaî
• a ridi di vinars, si vai la domenie
• al è inutil di vaî là che nol è rimiedi
• chei che a vain e àn simpri reson
• cui che al è colpe dal so mâl che al vai se stes
• cui che al gjolt dal mâl dai altris co a vegnin lis disgraciis al vai di bessôl
• cui che al gjolt la domenie al vaiarà di lunis
• cui che al rît di vinars al vai di domenie
• cui che al rît in zoventût al vai in veglece
• daspò dal ridi al ven il vaî
• i vedui il prin dì a vain, il secont se passin, il tierç se ridin
• il mont al è mâl scompartît: cui al vai e cui al rît
• il ridi al va a finîle cul vaî
• il test di Bertolt nol fale mai: cuant che al plûf lui al rît e cuant che al è soreli al vai
• lagrimuçs di femine, sudôr di cjaval e vaî di plevan nol è di crodi, che al è dut ingjan
• lis feminis dai laris des voltis a ridin, des voltis a vain
• no mi cjalâ di Avrîl che o soi intal covîl, cjalimi di Mai e se no ven, vai
• no podint muardi, lis feminis a vain
• nol vâl vaî là che nol è rimiedi
• une nuviçute co a va a marît cu la bocje e vai e cul cûr e rît
• vuê si rît, doman si vai