Dizionari de Lenghe Furlane

titul  /-ì-/  ti|tul  [FO]

1. s.m. non o frase curte che a segnin l'argoment di un scrit, di un libri, di une opare di art, di une iniziative e v.i.:  […] tun libri dal titul «Storie de art in Friûl», stampât cul contribût de Provincie di Udin e de Fondazion Crup e la colaborazion dal Comun di Udin (Erika Adami, O ai scrit pal gno popul); a passin dutis lis pagjinis un par une, ma a lein nome i titui e a saltin di plante fûr ducj i articui (Riedo Pup, La civiltât dal fum); "Friûl che al vîf" al jere il titul sielt par un program che al tratave di storie, culture e atualitât furlane (Max Mauro, Un Friûl difarent: i 90 mhz di Onde Furlane)
2. s.m. opare publicade:  a partî dal 1999, cu la publicazion di un volum ad an, o sin rivâts a undis titui (Federico Vicario, Documents de Ete di Mieç pal studi dal furlan antîc); cheste ultime sezion e percoreve e e analizave la storie de animazion cinese dai agns Cuarante ai nestris dîs, traviers di 16 titui jenfri curts e luncmetraçs (Fabian Ros, Far East Film, la Asie a Udin)
   Sin. opare , lavôr
3. s.m. indicazion dai studis, de profession, de nobiltât o di merits particolârs di une persone:  al jessì de Academie cul grât di uficiâl di artiliarie e cul titul di inzegnîr (Giovanni Pillinini, Zuan Batiste Cavedalis - Une vite esemplâr); la nobiltât, scjafoiade des tassis, e scugnive dispès vendi terens e titui, che a vignivin comprâts da marcjadants di Vignesie (Josef Marchet, Cuintristorie dal Friûl fin sot la Italie); la Comission e valute i titui (publicazions, azions pe lenghe furlane e competence), ancje traviers un colocui (Adrian Cescje, Memoriis di politiche linguistiche)
   
   1. document che al prove il dirit di svantâ un apelatîf
4. s.m. [TS] sport il jessi campion:  co Carnera al veve pierdût il titul di campion dal mont, nissun voleve crodi (Alan Brusini, Amîs come prime)
5. s.m. [TS] ecl. non de persone divine, dal sant, dal agnul, dal misteri che al à la dedicazion di une glesie:  in Friûl si ricuardin passe une vincjine di gleseutis o anconis dedicadis a cheste sante [Sante Sabide], cundut che il titul al à vût po di jessi cambiât cun chel di santis plui "ortodossis" (Carli Pup, Memoriis platadis. Olmis di storie te narative popolâr furlane)
6. s.m. tiermin par definî cdn., dispès par criticâ o ofindi:  un socialist […] nus à dât, a noaltris regjonaliscj, il titul di "ingenui" (Josef Marchet, Svelts e dordei); nus gafave sfueis, penâi e regjistris e nus parave fûr cun ducj i plui piês titui di chest mont (Antoni Beline, Pre Pitin)
   Sin. peraulate , male peraule
7. s.m. (fig.) reson, dirit:  vevie madressût cualchi dirit? Par un câs, vevie titul a cualchi rifusion? (Carlo Sgorlon, Ombris tal infinît)
   Sin. dirit
8. s.m. [TS] dir. sudivision di un test normatîf di nivel plui alt rispiet al cjapitul:  lis disposizions dentri dal Titul IV si pues modificâlis mediant di leçs ordenariis (Aministrazion Publiche, Statût Speciâl de Regjon Autonome Friûl-Vignesie Julie); e je la leç regjonâl 29/2007 tal Titul V (articui 20/23) a ocupâsi dai intervents tal cjamp dai mieçs di comunicazion (Erika Adami, La promozion de lenghe furlane sui mass media)
9. s.m. [TS] fin. cualsisei azion o obligazion:  l'acuist di titui publics al fâs za part dai struments a disposizion de BCE (Patrizia Tiberi Vipraio, Euro o no euro: isal chest il probleme?)
10. s.m. [TS] chim., metal. percentuâl di une sostance intune leghe, soluzion e v.i.
11. s.m. [TS] econ., numism. rapuart tra pês dal metal preseât e pês totâl di une monede
    
    1. in riferiment al aur, percentuâl dal pês dal metal pûr e chel totâl pandût in carats
12. s.m. [TS] chim. rapuart tra la masse di une sostance in soluzion e il volum o il pês de soluzion o dal solvent
    
    1. cuantitât di sostance necessarie par inviâ une reazion cuntun ciert volum o cuntune cuantitât di une altre sostance
    2. intune misture combustibile, rapuart tra la masse dal combustibil e chê di dute la misture
13. s.m. [TS] tess. grandece che e definìs il grât di finece di une filidure daûr dal rapuart tra lungjece e pês:  la stopa di filâ a pos vegnî cjamada plui regolâr e il titul (il rapuart lungjeça/pês) jessi plui bon (Giorgio Ferigo, Da semença a fîl)
14. s.m. [TS] stor. inte Rome antighe, scrite che si metevile sot des imagjins dai vons par memoreâ i lôr merits publics

Polirematichis e espressions idiomatichis

• a plen titul loc.av.
• a titul di loc.prep.
• a titul personâl loc.av.