siet
/-è-/
siet
[FO]
-
s.m.
numar naturâl che al ven daspò dal sîs e prime dal vot e segn che lu rapresente:
«Cinc e doi siet» (Pieri Somede dai Marcs, Il tinel)
-
adi.num., pron.num.
in cuantitât di sîs unitâts plui une, ancje cun valôr sostantivât o cun sostantîf sotintindût:
suntun cjantonâl siet o vot libris metûts in file (Pieri Menis, A scuele);
tal tacuin siet francs in carantans, palanchis e vincjutis (Pieri Somede dai Marcs, Bandiere);
passât il novantesim, i minûts di recupar a son siet e al sucêt un pôc di dut (Marc Stolf, Udinese - Genoa 1-0)
-
adi.num., s.m.
ancje cun valôr di ordenâl o identificatîf intune serie o intune categorie:
e je in viaç iminente la «perturbazion» numar siet o vot o nûf (Riedo Pup, I furlans e il timp)
Sin. setim
-
s.m., s.m.pl.
setime zornade dal mês:
ai siet di Setembar dal 2014, Rosane e Renzo a àn celebrât lis gnocis di aur (Cristina Noacco, Faliscjis)
-
setim an di un secul:
i fruts plui dispatussâts, un sîs di lôr, che a jerin dal 1905, dal Siet, dal Vot, ju vevin sierâts tun colegjo di puars (Alan Brusini, Come tai romançs)
-
s.f.pl.
setime ore daspò de miezegnot:
mi racomandi: a siet justis in pont, a vore, lunis che al ven (Roberto Ongaro, Il muc);
vuê di matine, a siet, o ai sintût, di gnûf, cjantâ pe vile (Laurin Zuan Nardin, Cjantâ pe vile)
Sin. siet a buinore
, siet di buinore
, siet di matine
-
setime ore daspò dal misdì:
la gnove e rivà a cjase mê sot sere, a saran stadis siet, e la taule e jere preparade pe cene (Alan Brusini, La cartuline);
a riva la coriera, chê das siet, e a discjama i pendolârs / la animazion a impia cjâfs e plaça e po a si studa denti a un bar (Giorgio Ferigo, Sabida di sera)
Sin. siet di sere
-
s.m.
judizi scolastic che al rispuint a di un profit plui che suficient:
cjapâ siet tal compit di matematiche
-
s.m.
cjarte di zûc contrassegnade dal numar siet o cun siet elements:
"Balote! Tu mi âs fat capî di vê il trê di denârs e tu mi butis il siet. Tu mi âs fat straçâ la briscule!" (Checo Tam, Se ti perdi tuo danno)
-
s.m.
(coloc.)
sbregadure o tai a scuare:
i jentre une sclese [di bombe] intune culate che alore i Titins sal strissinin daûr e par gjavâje ur tocje fâi un siet cul curtìs e medeâlu ae buine di Diu (Ivano Urli, Storie di Min);
saltarin un fossâl, / e il siôr, ingredeantsi intun cison, / al fasè doi biei siets tel veladon (Pieri Çorut, La mê ospitalitât)
-
s.m.
pôre improvise:
i compagns, massime dopo chel siet dal sivîl, a 'nd jere tancj pronts a cedi lis lôr dalminis a lui, sacrificâsi e tornâ indaûr discolçs (Riedo Pup, Gran Dio benedite l'Italia)
Sin. spac
, spaghet
, sbigule
, spavent
-
s.m.
[TS]
sport
tal balon, cjanton alt de puarte:
punizion di Muriel, tirade benonon juste tal siet, che e torne a puartâ la Atalanta in vantaç (Marc Stolf, Udinese - Atalanta 2-3);
un portiron che al svole a gjavâ vie la bale dal 7 dulà che e jere inviade a finî (Laurin Zuan Nardin, Vincjedoi)
Polirematichis e espressions idiomatichis
Proverbis:
- a fâ di so cjâf, si vîf siet agns di plui
- a pestâ aghe tal mortâl, ancje daspò siet agns e jes aghe
- a vuelin siet umign a fâ une cjase, e baste une femine a strucjâle
- al è miôr brusâ siet vilis che no pierdi un dirit
- ancje il just si inçopede siet voltis in dì
- il pan dai altris, chel plui bon, al à siet crostis e chel plui dûr ind à nûf
- il pan dai parons al à siet crostis
- il pan di servî al à siet crostis e bisugne rompi i dincj par mangjâlu
- la blesteme a va ator siet agns e po e torne a colâ su par cui che le da
- lis feminis a àn siet vitis e un vitin
- lune setembrine a siet lunis si inchine
- ogni cjase al è il so diaul e tai convents a son siet diaui par cop
- pan di paron al à siet crostis e un croston
- prin di maridâsi siet braçs e une lenghe, daspò maridadis siet lenghis e un braç
- Sante Catarine o sîs o siet co vigne, spietimi a Sant Tomât che o vignarai cul cjar cjamât
- se al plûf a Sant Zorzon, siet montanis e un montanon
- se nol cjante ai siet o ai vot, o che al è muart o che al è cuot