Dizionari de Lenghe Furlane

servizi  /-vì-/  ser|vi|zi  [FO]

1. s.m. lavôr fat par un paron, in cundizion subordenade, in câs ancje in cundizion di pierdite de libertât:  Citolini al dedicave une sô Grammatica de la lingua italiana manuscrite […] al grant dignitari Hatton, di sigûr cu la sperance di jentrâ al so servizi (Mario Turello, Il brevet)
   
   1. lavôr fat in cjase di un paron, spec. par tignî net e in ordin:  no veve ancjemò dîs agns Catine, che il vieli Bastian al cumbinâ cul gastalt dal cont di Trep di meti la frute a servizi (Gianni Gregoricchio, Trê feminis)
   2. personâl che al lavore par un paron, spec. pai lavôrs che a coventin in cjase:  vê un bon servizi (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
2. s.m. impegn totâl a pro di une persone, di une istituzion, di une cause, di un ideâl, e v.i.:  Sant Ignazi di Loyola […] si è metût anime e cuarp al servizi di Crist e de glesie, fondant la Compagnie di Jesù (Antoni Beline, Sant Jacum, là che al finìs il mont)
   
   1. in espressions di cortesie:  "Sigûr, Ecelence, al vuestri servizi." (Franco Marchetta, La bandiere di Bertrant)
   2. ativitât fate in maniere servîl, par zovâ a cdn. o par cuistâ il favôr di cdn.:  ce funzion àno fate i gjornâi talians fintremai in dì di vuê? Nome chê di dâle ad intindi in dut e pardut o a favôr dal guvier o cuintri dal guvier, e simpri al servizi di un partît (Josef Marchet, Il pietin e il grop)
3. s.m. lavôr fat li di une dite publiche o privade:  lis modalitâts di organizazion a son diferentis se il docent al è za in servizi te scuele […] o se il docent al ven di fûr (Patrizia Pavatti, Il furlan al è rivât tes nestris scuelis. Si met in vore il Regolament pal insegnament de marilenghe in regjon)
   
   1. ativitât fate intes fuarcis armadis o sim.:  tratantsi di une colonie militâr, i umign a restavin obleâts al lôr servizi in Aquilee o in cualchi piçul presidi (Josef Marchet, Cuintristorie dal Friûl fin sot la Italie); al jere l'ispetôr di polizie Amedeo Fabretti, che al jere di Mantue, ma che za di passe vincj agns al faseve servizi a Udin (Roberto Ongaro, Cretevierte)
   2. singul turni di lavôr:  al veve durmît un pâr di oris prin di montâ in servizi (Agnul di Spere, In viaç di domenie)
4. s.m. tun ambient, ativitât che si fâs pai clients:  ca fasino servizi ancje ai taulins o dome al banc?
   
   1. tun ristorant, moment de zornade di lavôr cuant che a son i clients in sale:  vê la linie pronte pal servizi
5. s.m. at che al zove:  [Radio Onde Furlane] e fâs un grant servizi ae lenghe furlane, stant che e je la sole radio in lenghe furlane, e la sô cualitât gjornalistiche e linguistiche si juste cul passâ dal timp simpri di plui e simpri miôr (Adrian Cescje, Memoriis di politiche linguistiche)
   Sin. favôr , plasê²
   
   1. (antifr.) at che al fâs dam:  lait a cjalâ, te inchieste di chest numar, ce biel servizi che al è stât fat al nestri teritori permetint di tirâ sù cheste infrastruture (Erika Adami, La gabe di Terna ai furlans)
6. s.m. prestazion furnide di un ent public o privât par sodisfà une dibisugne de coletivitât:  intervignî cun plui determinazion e eficacie par garantî l'ûs des lenghis di minorance tai mieçs di comunicazion, cun riferiment particolâr al servizi radiotelevisîf public (Erika Adami, La lenghe furlane tai mieçs di comunicazion); l'iluminament [public] al jere procurât de flame dal vueli, e chest si lei intal rindicont economic di spese buride fûr dal furnidôr dal servizi (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât); une des peraulis clâf dal turisim dal avignî e je la "cualitât" dai servizis a disposizion dai visitadôrs e de popolazion residente (Attilio Celant, Il rûl economic dal turisim in Italie)
7. s.m. division inte organizazion di une dite o di une istituzion:  cu la leç regjonâl 15/1996 al ven metût in pîts, sot de "Direzion de Istruzion e de Culture", il "Servizi pes lenghis regjonâls e minoritariis" (Donato Toffoli, Relazion dal Grup di lavôr "Planificazion linguistiche")
   Cfr. ufici , sezion
8. s.m. complès di ogjets doprâts par une cierte robe, in particolâr par parecjâ la taule:  arint, cristalarie, cuadris, stampis di valôr, servizis di porcelane, soremobii (Carlo Sgorlon, Ombris tal infinît)
9. s.m. articul, program, filmât, documentari o sim. suntun argoment specific:  a son jessûts articui e servizis che a descrivevin particolârs che no son mai esistûts te realtât dai fats (Christian Romanin, Amato De Monte: Il Friûl, patrie des bataiis di civiltât)
10. s.m. tal pl., puest li che si va a fâ i bisugns, massime tun edifici public o tun ambient:  "Al vûl viodi i servizis? E parcè?" "Cussì" dissal Begot "O soi curiôs". […] Nol jere tant ce viodi. Dut ce che si podeve dî al è che i gabinets a jerin nets (Fabian Ros, La rambe)
    Sin. gabinet , necessari
    
    1. at di fâ i bisugns, di urinâ o di defecâ:  si smanizin cursôr, segretari, / il siôr sindic nol sa plui ce fâ / cuant che i cjans montin sù pa lis scjalis / plen di smanie si tache a sberlâ. / Dut inutil e sul us del ufizi / dopo fat il lôr solit servizi / si presentin […] (Zaneto, I cjans in Comun)

Polirematichis e espressions idiomatichis

• fâ servizi loc.v.
• fâ un viaç e doi servizis loc.v.