Dizionari de Lenghe Furlane

note  /-ò-/  no|te  [FO]

1. s.f. regjistrazion di un dât o scrit curt cuntune memorie par se stes o un messaç par altris:  notis impuartantis come la ploie colade in ce mês e in ce an, trope nêf e se sute o bagnade (Alan Brusini, Gian Paolo Linda, I forescj)
   Sin. apont² , notazion
2. s.f. coment a un test o su di un argoment, scrit o ancje coment a vôs:  te Histoire de ma vie si cjate invezit il Refosc, e dutis lis notis a comentin che tal Sietcent il plui preseât al jere chel di Faedis (Pierluigi Visintin, Friûl e furlans te Histoire de ma vie di Giacomo Casanova); simpri a rivuart dal ûs sociâl de lenghe, une ultime note: e mancje […] une struture stabile e ricognossude, buine di lavorâ in mût sientific sui cambiaments che a integnin il lessic (Donato Toffoli, Relazion dal Grup di lavôr "Planificazion linguistiche"); i lavin daûr atents [te visite aes oparis di art], fasintsi cualchi note, scambiant un cul altri judizis e opinions (Zuan Lurinçon, La Madalene)
   Sin. coment , glosse
   
   1. scrit curt, dispès cuntun numar o simbul di rimant, che si lu zonte a un test par sclarî une sô part:  o publichi pe prime volte il sonet, doprant la redazion Aa cun in note chês dôs variantis che si cjatin inte redazion A (Zorç Cadorin, Doi autografs di Toni Broili framieç dai manuscrits furlans di Berlin conservâts a Cracovie)
3. s.f. [TS] scol. comunicazion di un docent che al rimarche un compuartament negatîf di un arlêf:  la mestre, stufe di lotâ cuintri di me […] mi veve metude une note sul cuader (Gianni Gregoricchio, Trê feminis)
4. s.f. articul di gjornâl che al pant une posizion sore di un argoment:  al è di un pieç che o scrîf e o publichi articui e notis par furlan, massime sul orghin politic dal Moviment Friûl (Adrian Cescje, Memoriis di politiche linguistiche); une note di costum
   Sin. coment , scrit
5. s.f. comunicazion, ancje uficiâl, che e pant un parê su di un probleme:  cualchi an indaûr une note dal ministeri de istruzion e veve marcât un probleme di fonde dal insegnament-aprendiment de lenghe taliane (Gotart Mitri, Rispietìn la marilenghe)
   Sin. comunicât
6. s.f. liste di ce che si à di paiâ o fâsi paiâ:  o clami il camarîr. Mi presente la note pleade in doi (Arturo Feruglio, Viaç a Vignesie); vô notais vulintîr, massime a cierts capos di famee… e note, e note, e sglonfe la note fin che rivais adore di mangjâi cualchi cjamput… (Pieri Somede dai Marcs, A la oselade)
   Sin. cont¹
7. s.f. [FO, TS] mus. segn che al pant un sun inte scjale musicâl:  imparâ a lei lis notis dal pentagram
   Sin. note musicâl
   
   1. sun rapresentât di chel segn:  une armoniche estrose che, a voltis, e leave ben dutis lis notis o lis distacave a colp par dâ gnerf al sun, a voltis lis distirave a lunc parsore di un fonts plen di armonie (Maria Forte, La cjase dal Murat); mi plâs sintî lis notis che a jessin de radio (AAVV, Sul florî)
8. s.f. (fig.) maniere particolâr di pandi o di pandisi, o ancje maniere di fâ stâ chei altris:  di sigûr mi visi che la sô vôs e pandeve une note di delusion (Gianni Gregoricchio, Trê feminis); o volarès sierâ cheste lezion cuntune note di otimisim (Sergio Cecotti, Il risultât eletorâl dai partîts di identitât teritoriâl - A case study: Scottish National Party); la parone [de ostarie] lu viodeve simpri vulintîr par vie che al puartave une note legre (Angelo Covazzi, Il dint)

Polirematichis e espressions idiomatichis

• a claris notis loc.av.
• cjapâ note loc.v.
• dâsi in note loc.v.
• metisi in note loc.v.
• tignî note loc.v.

Proverbis:

• la sinceritât e à lis notis altis