Dizionari de Lenghe Furlane

necessitât  ne|ce|ssi|tât  [FO]

1. s.f. cundizion che e je plui fuarte dal volê dal om:  la sô no jere avarizie, si ben une necessitât dai timps e soredut, par lui, une robe naturâl, abituât come che al jere a mangjâ a cjase polente e lidric (Pieri Menis, Gno nono)
   Sin. scugne , scugnî
   
   1. [TS] filos. cualitât di ce che al è e nol po no jessi o nol po no deventâ:  il so concret Teatri mnemonic al è la copie di un salt edifici metafisic, lis sôs tassonomiis a àn caratar di necessitât, di eternitât (Mario Turello, Il brevet)
2. s.f. cundizion di dificoltât, spec. economiche:  e jere simpri plui persuadude di sei une vore in necessitât (Franca Mainardis, Il sium di Lissandri)
3. s.f. il coventâ, il jessi dibisugne o il vê dibisugne:  cjape chestis trê coculis [magjichis]. Tu âs di rompilis dome in câs di necessitât (Andreina Nicoloso Ciceri, Blancje come la nêf - Racconti popolari friulani I); grancj discors su la necessitât e la fortune di vê liberât Triest, i Sudtirolês e i Istrians (Riedo Pup, Vitoriis e batostis)
   Sin. dibisugne , bisugn , bisugne , esigjence
4. s.f. robe o complès di robis che a coventin:  la colonie romane di Aquilee e jere stade implantade par necessitâts strategjichis (Josef Marchet, Cuintristorie dal Friûl fin sot la Italie)
   Sin. dibisugne , bisugn , bisugne , esigjence

Proverbis:

• bisugne fâ di necessitât virtût
• crôt ce che ti pâr ma no stâ contradî cence necessitât
• cui che al zuie par dibisugne al piert par necessitât
• fuart cui che no si lasse vinci dal pudôr, plui fuart cui che no si lasse vinci de necessitât
• in câs di necessitât ancje il lôf al mangje moscjis
• l'aur si provilu tal fûc, la amistât te necessitât
• la miserie e la necessitât a fasin l'om lari
• la necessitât e fâs l'om inzegnôs
• la necessitât e fâs l'om mestri
• la necessitât e fâs la industrie
• la necessitât e insegne a fevelâ
• la necessitât e insegne a lavorâ
• la necessitât e je mari da la industrie
• la necessitât e romp il fier
• la necessitât no cognòs leç
• necessitât e fâs virtût
• necessitât no à leç
• necessitât romp leç
• si scuen fâ di necessitât virtût