Dizionari de Lenghe Furlane

moviment  /-è-/  mo|vi|ment  [FO]

1. s.m. at e efiet dal movisi, dal cambiâ di puest, di posizion, di direzion, sedi in maniere puntuâl che in maniere seguitive:  une vuardie e veve za disfodrât la spade, ma Bertrant le fermà cuntun moviment de man (Franco Marchetta, La bandiere di Bertrant); la ruede, pe sô forme e pal so moviment circolâr tant che chel aparent dal Soreli ator de Tiere, [e je] un simbul solâr (Sandri Carrozzo, Il miluç de magne); se si gjave il servizi dal cursus publicus, che al doprave cjavai polsâts e svelts […] il moviment di int e marcjanzie al leve a planchin (Mirta Faleschini, Stefano Magnani, Aldo Candussio, Gaetano Vinciguerra, Protostorie e storie romane in Friûl); produsi energjie eletriche dal moviment di cjamps magnetics (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât)
2. s.m. complès di azions di un grup, spec. cun obietîfs militârs:  [un avion austriac] al veve viodût dut chel moviment di trupe pai trois e pes mulatieris, subit daûr des primis liniis, e al veve dât l'alarme (Pieri Menis, La glesiute dai alpins); al organizà un servizi di informazions, imprest indispensabil par cognossi i moviments e lis intenzions dal nemì (Giovanni Pillinini, Zuan Batiste Cavedalis - Une vite esemplâr)
3. s.m. ativitât fisiche:  fâ moviment al sbasse il pericul de osteoporosi e di colâ e rompisi i vues (Guglielmo Pitzalis, Ocjo ai vues!)
   Sin. esercizi , gjinastiche
4. s.m. il cjatâsi e il lâ ator di int, di machinis, e v.i.:  la int e jes di glesie, e jemple la place di colôrs, di vôs, di moviment (Dino Virgili, La aghe da pît la cleve); il trafic al jere scjars e Ernest al saveve che lant de bande di Berne al varès cjatât pôc moviment fin dongje de citât (Agnul di Spere, In Friûl, nossere)
   Sin. businâ , circolazion , corîr¹ , daidai , fulugne , maneç , negozi , 'siminâ , smaneç , vite , zîr
5. s.m. corint culturâl, artistiche, politiche e v.i.:  i volaran dîs agns, e la scjassade puartade dal moviment di Usmis, par fâ capî ai zovins e ai creatîfs che il furlan al pues lâ adun ancje cu lis produzions di avanvuardie artistiche (Max Mauro, Un Friûl difarent: i 90 mhz di Onde Furlane); i autonomiscj dal Trentin e Bas Tirôl che a jerin dividûts in cuatri o cinc moviments in contrast un cul altri (Josef Marchet, Esam di cussience)
   
   1. (par anton.) cun iniz. maiusc., viôt Moviment Friûl :  Faust Sclâf, president dal Moviment, al interven te presentazion di Aquilee par marcâ il significât politic de traduzion dal Vanzeli (Adrian Cescje, Memoriis di politiche linguistiche)
6. s.m. [TS] art impression che lis figuris rapresentadis intune opare si movin:  i uciei [dai mosaics de Aule Nord de basiliche di Aquilee] rapresentâts cun perfezion fintremai tes sfumaduris, a restin pardabon vîfs tal lôr moviment (Giovanni Battauz, Flavio Cossar, Renato Iacumin, I mosaics de basiliche di Aquilee)
7. s.m. [TS] econ., bancj. jentrade o jessude di une sume di bêçs:  fâs fâ ancje une indagjin tes bancjis par capî se a son stâts fats moviments di bêçs viers privâts (Sandri Di Suald, Ah! la provincie)
8. s.m. [TS] mat. isometrie di un plan o di un spazi tridimensionâl su se stes in mût che dôs figuris corispondentis a puedin lâ a poiâsi justis une sore di chê altre
9. s.m. [TS] mus. velocitât di un toc
   
   1. let. ritmi di un scrit leterari
10. s.m. [TS] mus. ognidune des parts o dai timps di ogni forme musicâl

Polirematichis e espressions idiomatichis

• meti in moviment loc.v.