Dizionari de Lenghe Furlane

moscje¹  /mò-/  mos|cje  [AF, TS]

1. s.f. entom.com. non gjeneric di plui insets dal gjenar Musca, piçul e cu lis alis, che al mangje pal plui sostancis in decomposizion:  lôr sentâts fûr de puarte si paravin des moscjis dispetosis dal timp che al mude (Maria Forte, La cjase dal Murat); "Cuant ti maridistu?" disse la moscje. / "A carnevâl, po." dissal il gri. / "O ven cjatâti." disse la moscje. / "Anìn, anìn, po. - dissal il gri." (Popolâr, Il gri e la moscje)
   Cfr. moscjin , mussat , tavan
   
   1. (fig., iperb.) in plui metaforis o paragons par dî alc di une vore piçul, pôc impuartant, pôc inteligjent, che al fâs pôc sunsûr, o par dî plui robis o personis in grande cuantitât e v.i.:  al jere un bon om, no bon di copâ nancje une moscje (Alan Brusini, Amîs come prime); al somee che la politiche e sedi dispossente, come une moscje che e bat simpri su chel veri (Sandri Carrozzo, La Catalogne in spiete); i gjornaliscj a saressin rivâts come lis moscjis (Jaio Furlanâr, L’indemoniât di Verzegnis); i mucs che e jerin li parsore, su la crete plui alte, a traevin come mats. I alpins […] a colavin come moscjis, un daûr l'altri, un daûr l'altri... fin che a 'nd jere… (Pieri Menis, Tinut di Libro)
2. s.f. çufut di barbe lassât cressi sot dal lavri disot:  al vignive incà il vieli: Condo, un bocon, cuntun pâr di moschetis!, la moscje, dôs ceis tant che sterps (Meni Ucel, Justizie)
   Sin. moschete
   Cfr. barbuç , barbe¹
3. s.f. (fig.) ande gnervose o rabiose o dispietose:  "Oh! sêso ca, bruts bacanots che sês, us ise passade la moscje di chê altre sere?" (Pieri Somede dai Marcs, A la oselade)
4. adi.inv. [TS] sport viôt pês moscje

Polirematichis e espressions idiomatichis

• lat di moscje loc.s.m.
• ni lenzisi ni parâsi des moscjis loc.v.
• ni lenzisi ni parâsi di moscjis loc.v.
• passâ une moscje loc.
• saltâ la moscje loc.v.
• saltâ la moscje al nâs loc.v.
• viodi moscjis par cjavai loc.v.

Proverbis:

• a tignî la bocje sierade, no jentrin lis moscjis
• cuant che a businin lis moscjis di Zenâr, slargje il braç piorâr; cuant che a businin lis moscjis di Fevrâr, strenç il braç piorâr
• cui che al è maridât al è une moscje cence cjâf
• dutis lis moscjis i dan aduès al cjaval magri
• e tire plui moscjis une gote di mîl che no un barîl di asêt
• i fals amîs a son come lis moscjis: fin che a cjatin di mangjâ a stan in cusine
• il ragn cu la sô tele al cjape moscjis ma no moscjons
• in câs di necessitât ancje il lôf al mangje moscjis
• l'avâr al coparès lis moscjis par vendi la piel
• l'avâr al sclape la moscje par vê la piel
• la robe metude in mostre, le sporcje la moscje
• lis moscjis si lis cjape plui prest cu la mîl che no cul asêt
• no bisugne cjapâ dutis lis moscjis che a svolin
• no si cjape lis moscjis cul asêt
• no si po vê la mîl cence lis moscjis
• ogni moscje e beche
• si cjape plui moscjis cuntune tace di mil, che no cuntune bote di asêt