Dizionari de Lenghe Furlane

lari  la|ri  [AF]

1. s.m., adi. che, cui che al robe:  tal scûr dal curtîl a colp si impie la lûs e il lari al reste jenfri il paron che al vose sul puiûl e la vuardie de bande dal broili (Alan Brusini, Alpin jo mame!); laris che a netavin cjasi e stai tant ben e in pressa (Novella Cantarutti, "Sì che i vevi na marosa")
   
   1. ancje in espression di ofese gjeneriche o di imprecazion:  i dan dal lari, dal bastart, dal infam. Lu menacin di muart… (Raffaele Serafini, Contis sot spirt); cussì pal bon ordin, / chel brâf funzionari / si sglonfe di bacaro; / l'è plen come un lari (Romeo Battistig (?), Ai Piombi); "Donald, sango lari, tachistu ancje tu?" (Stiefin Morat, Donald dal Tiliment)
2. s.m., adi. (fig.) cui che al vuadagne o al cjape plui dal so dirit:  In place e jere stade confusion in chê zornade. Cuintri il Sindic che nol lavorave just, che al jere un lari spacât, a zigavin (Maria Forte, Slobar); al à vivût a Buie un om che a 'nd à fatis di ducj i colôrs; ma plui di dut al fasè il lari, il strocin de puare int che e leve a cirî bêçs di lui (Pieri Menis, Lis leiendis di Buie)
   Sin. birbant , brigant , galiot , ladron
   
   1. cui che al pretint une paie o che al domande presits masse alts:  ce presits! chel becjâr al è un lari
3. adi. (fig.) plen di voie, di brame:  lui i cjapave la man a strent e le brusave cui voi laris (Dino Virgili, La aghe da pît la cleve); i disastris politics di Vignesie e de sô gose 'save e lare (Angelo Floramo, Di scjas in scjas: i taramots inte storie furlane. Introduzion aes pontadis)
   Sin. voiôs , bramôs , golôs

Proverbis:

• a robâur ai laris no si fâs pecjât
• a robâur ai laris nol è pecjât
• a un lari in cjase no si siere mai
• ai laris di cjase no si siere mai
• ai laris no si ur robe
• ai laris no si ur siere lis puartis
• al è lari cui che al robe e cui che i ten il sac
• al è lari tant cui che al robe che cui che al ten il sac
• al è tant lari chel che al robe che chel che al ten il sac
• cu la pazience si è maridât un frari e tal doman al è deventât un lari
• cuant che il lari al à robât,nol ocor sierâ la puarte
• cui che al è bausâr al è ancje lari
• di gnot a zirin i laris e i inamorâts
• i laris piçui si picjiju, i grancj si lassiju cori
• il lari piçul al va in preson
• int di confins o laris o sassins
• la dibisugne a fâs l'om lari
• la femine dal lari no rît simpri
• la lune ur fâs lusôr ai laris e ai inamorâts
• la miserie e la necessitât a fasin l'om lari
• la ocasion e fâs l'om lari
• lare la mari, lare la fie, lari chel che le puarte vie
• lari di nature fin a la muart al dure
• lari e avocat al è un non sôl
• lari piçul no stâ robâ che il lari grant ti fâs picjâ
• lari piçul no stâ robâ che il lari grant ti picjarà
• lis feminis dai laris des voltis a ridin, des voltis a vain
• miôr laris ogni un tant che no mantignî simpri il cjan
• tai paîs dai laris ducj a son galantoms
• tal paîs dai laris la man su la borse