ingrumâsi
in|gru|mâ|si
[AF]
-
v.pron.intr.
(ancje fig.)
formâ une grande cuantitât dute insiemi, dâsi dongje in grande cuantitât, sedi di robis materiâls che imateriâls:
difûr al neveave a grancj flocs blancs e la nêf si ingrumave sui cuvierts (Pieri Menis, Nadâl ancje par Gjelmin);
Polvar. Polvar che si ingrume sui miei libris. Polvar che si ingrume sui miei discs. Polvar come timp che al cor (Checo Tam, Polvar)
Sin. dâsi dongje
, dâsi adun
, zontâsi
, intassâsi
, intropâsi
, tirâsi adun
, tirâsi dongje
-
di plui personis, strenzisi une dongje di chê altre, soredut in tancj di lôr:
ducj a tasevin e si ingrumavin tor il fogolâr a gjoldi lis vilotis di Brusin (Riedo Pup, Vigji Brusin);
la matine, un pôc prin da la ore, noaltris fruts si ingrumavin su la strade denant la puarte de scuele e li a zuiâ, pastiçâsi, cuistionâ e ancje patufâsi (Pieri Somede dai Marcs, Il gno prin mestri)
-
di un singul, sentâsi o poiâsi in mût di stâ cui braçs e cu lis gjambis tiradis dongje dal cuarp, o strenzisi in mût di cjapâ mancul puest che si pues:
in chê sere la viele a si tirà in cjamare plui adore dal solit: si ingrumà tal cjadreon e li e restà cuntun grant pês sul cûr (Pieri Somede dai Marcs, Cun pocje spese…);
Pieri si lassà colâ jù suntun scjalin e si ingrumà cul cjâf sui zenoi (Amedeo Giacomini, Tal ospedâl)
-
v.pron.intr.
restâ di fâ, di frontâ, di sodisfâ e v.i.:
chel maledet di un timp nol vûl metisi a bon e intant ducj i lavôrs si ingrumin (Pieri Somede dai Marcs, Resurezion a Pontinie)
-
v.pron.intr.
di nûi, brut timp o sim., infissîsi e deventâ menaçôs:
dute sfolmenade tal viodi ingrumâsi par aiar il burlaç. «Ustin» dissè 'Sese businant di abàs, «al tone, spessee a tacâ la vacje!» (Ivano Urli, La musiche);
prime la basse, e la montagne fume. / Sofle la buere e il temporâl si ingrume (Pieri Çorut, Il Strolic furlan par l'an 1835)
Sin. inmaneâsi
, ingropâsi
-
v.pron.intr.
[BF]
dâsi dongje in tocs di consistence plui fisse
Sin. imbrucjîsi
-
v.pron.intr.
(pop.)
cjapâsi strents in maniere sensuâl, bussâsi e v.i.
Cfr. cjossolâ
, limonâ
, mastruçâ
, palpâsi
, palpignâsi
-
v.pron.tr.
ingrumâ alc di se stes, par se stes, tor di se stes o cun reciprocitât:
al olme la sô pelande picjade su di un claut. Al reste par un moment pinsirôs, se metile sù daurman o miôr di no: cumò al è cjalt, ma di tarde sere al sarà frêt e umit. Al distrighe di puartâse vie e si la ingrume su di un braç (Franco Marchetta, Madalene);
orpo ce pecjadon che o mi ingrumi su la cussience (Costantino Smaniotto, Co l'amôr al cimie)
Proverbis:
- il mês di brume ogni diaul si ingrume
- il mês di brume ogni peçot si ingrume