zontâsi
zon|tâ|si
[AF]
-
v.pron.intr.
rivâ in plui rispiet a alc o a une cuantitât che e je za:
la pôre dal doman si zontave a la vergogne di jessi li a slungjâ la man come un puar (Carlo Sgorlon, Prime di sere);
l'episodi al è cetant incuietant e al va a zontâsi a dute une schirie di atacs che il podê legâl al stave fasint aes autonomiis che la int des tendopolis e veve otignût (Igor Londero, Cuintristorie dal taramot);
tai agns Setante, [a chês altris grafiis furlanis] si zontarin chê di Scuele Furlane e [chê] di Giorgio Faggin, codificade tal Vocabolario della Lingua Friulana dal 1985 (Adrian Cescje, 30 agns di grafie uficiâl de lenghe furlane: il percors)
Sin. inzontâsi
, sumâsi
, metisi dongje
-
v.pron.intr.
metisi dongje, in maniere di unîsi o di stâ tacât:
la vie di Aquilee si zontave cun chê che e vignive di Concuardie, prin di dividisi tes dôs stradis par Virunum e par Aguntum (Mirta Faleschini, Stefano Magnani, Aldo Candussio, Gaetano Vinciguerra, Protostorie e storie romane in Friûl);
jo o volarès, come chê leture che o vês sintude vuê, che i vues de Cjargne si zontassin tal puest just, par che a tornin a jevâ sù e a vivi. (Francesc Placerean, Il popul furlan al à ancjemò nostalgjie des robis bielis e santis)
Sin. inzontâsi
, leâsi
, peâsi
, tacâsi
, unîsi
, cometisi
-
v.pron.intr.
metisi dongje di altris personis o elements, formant une compagnie, un grup, une comunitât e v.i.:
Pieri ju cjalà par un moment ma no si zontà al trop (Amedeo Giacomini, Tal ospedâl);
i trê si jerin zontâts a altris fantacins di Trivignan e a jerin lâts in vuere… in vuere cuintri chei di Viscon! (Checo Tam, I nemîs)
Sin. dâsi dongje
-
v.pron.tr.
zontâ alc par se stes o cun reciprocitât:
e fitave cjamaris par zontâsi alc ae pension che i veve lassade l'om (Alan Brusini, Gian Paolo Linda, I forescj)