Dizionari de Lenghe Furlane

ghets  /-è-/  ghets  [CO]

1. inter. comant di lâ vie, soredut fevelant ai gjats, e in maniere colocuiâl o scuasi di dispresi cu lis personis:  par clamâlu, un gjat furlan vêr al sint dome “tui tui”. Se al cumbine alc che nol va, o par parâlu vie, si dopre “ghets!” (Dree Venier, Cemût fevelâ la marilenghe aes bestiis); cuant che [il gjat] el va par dâi la gafa al cicin o a sgarfà tor des pagjelis, lu fasin fuî cul dîgji: "Ghets!" (Toni Riep, Cimût che la int di campagna e cîr di intindisi cu lis bestiis di cjasa)
2. inter., s.m. soredut in costruzions negativis, singule peraule o espression:  guai une peraule, Diu nus vuardi olsâ dî ghets (Ivano Urli, Storie di Min); in dute la cjase no si sintive un ghets (Gianni Gregoricchio, Îr e doman)
   Cfr. et , cit² , cic
   
   1. [BF] cuantitât minime:  el cjalt al ûl scjafoiâju, puore int! [...] Nancje un ghets di aiarin, no! (Dolfo Zorzut, El gjirassol)
      Sin. tic¹ , tinin , tininin , ninin , fregul , fruçon , freghegnin

Polirematichis e espressions idiomatichis

• dî ghets loc.v.

Proverbis:

• tant tui tui e tant ghets ghets