fidâsi
fi|dâ|si
[AF]
-
v.pron.intr.
vê sperance, cuntune cierte sigurece e volontât, che cdn. si compuartarà intune cierte maniere o che alc al sucedarà intune cierte maniere:
il cont Rote di Sant Vît dal Tiliment, che par vie di feminis al veve ereditade dute la robe dai conts Bertui, fidantsi di lui […] lu veve nomenât so agjent (Pieri Somede dai Marcs, Pre Josef);
e sintive che e podeve fidâsi, e che chel om, jentrât in ponte di pîts inte sô vite, al jere la uniche persone che e podeve e che e voleve dâi une man (Franca Mainardis, Il sium di Lissandri)
Sin. crodi
, infidâsi
, fâ stât
, difidâsi
-
calcolâ che cdn. al disi la veretât, che al sedi tal just e sim.:
«Tal zuri… fiditi di me…» (Pieri Menis, Si disarès che e je inventade);
se ti ocor alc conseiti cun lui, fiditi di lui che lui al sa simpri dut (Pieri Somede dai Marcs, Vilie di Nadâl (teatri))
-
calcolâ che alc al puedi dâ sigurece:
o ai scugnût partî di strade dal ebraic e dal grêc parcè che no podevi fidâmi des traduzions (Franc Fari, Il cjâf dai furlans)
-
v.pron.intr.
vê il cûr, l'ardiment di fâ alc:
no mi fidi masse a lâ vie di bessôl (Arturo Feruglio, Viaç a Vignesie);
no si jere mai slontanât tant; si jere simpri fermât tai paîs des culinis, no si jere mai fidât a vignî tant injù (Roberto Ongaro, Cretevierte)
Sin. olsâ
, infidâsi
, permetisi
-
v.pron.intr.
meti se stes te cundizion di dipendi cun fiducie di cdn. o di alc:
al à superât chel dolôr imens tornant a fidâsi a lui [a Diu] (Letizia Magri, Franca Mainardis, Peraule di vite: Dio cun nô)
Sin. abandonâsi
, racomandâsi
, rimetisi
, avodâsi
Var. afidâsi
Proverbis:
- al è plui ce fidâsi dal cjan che al baie che no di chel che al tâs
- crodii a ducj e no fidâsi di nissun
- fidâsi di ducj e di nissun
- fiditi di pôcs e vuarditi di ducj
- no stâ fidâti di chei che a tirin jù i sants in glesie
- no stâ fidâti di cui che al è sant in glesie e diaul in cjase
- no stâ fidâti di cui che no si fide
- no stâ fidâti tai sants che a cjiin
- nol è ce fidâsi di cui che al è sant in glesie e diaul in cjase
