façolet
/-èt/
fa|ço|let
[FO]
-
s.m.
toc di tiessût lizêr, doprât par soflâsi il nâs, suiâsi il sudôr e v.i.:
prime di votâ, ducj a cjalavin il cont: se al sgnofrave il nâs, al jere di votâ sì; se al spacave il façolet, al jere no (Riedo Pup, Il façolet dal Dacian);
Tunine si suià une lagrimute cul façolet ricamât (Pieri Menis, Chei di Muraie);
o restai bon, cul façolet fracât sul nâs stant che o pierdevi sanc (Pierluigi Visintin, Friûl e furlans te Histoire de ma vie di Giacomo Casanova)
Sin. cuadrel
, mocichin
, smocj
, smocjit
, façolet di nâs
Cfr. cuadrel
, peçote
, peçot
, piece
-
s.m.
toc di tiessût, pal plui cuadrât, che lis feminis a metin o a metevin tal cjâf, par cuvierzi i cjavei, spec. tal vistî di une volte e tal costum tradizionâl:
lis feminis, cul façolet sul cjâf, a niçulavin sui zenoi (Pieri Somede dai Marcs, La sûr);
Rosute, sustant [pe muart di so fradi], e tirà fûr un façolet neri e sal ingropà daûr la cope (Dino Virgili, La aghe da pît la cleve);
li pinii dai fassalets butâts sù in cima il cjâf colm di streci, a zovavin a dâi un estru galandin (Novella Cantarutti, La femina di Marasint)
Sin. façûl
, cuadri
, façolet di cjâf
-
piçul toc di tiessût, doprât dai oms, tignût tor dal cuel par bielece o par suiâ il sudôr, ancje tant che distintîf politic o militâr, o ancje tignût in maniere di parâ o platâ la muse:
Toful al veve metût tor dal cuel un biel façolet ros, ingropât sul stomi (Dino Virgili, La aghe da pît la cleve);
cori a cjase prin di gnot, par no cjatâ su la strade cualchidun cul façolet su la muse e un scliçot di fier in man (Josef Marchet, Lis predicjis dal muini);
tun lamp il todesc al capì dut, par chel façolet compagn che a vevin ducj intor dal cuel (Maria Forte, La Madone de Pâs)
Sin. façolet di cuel
-
piçul toc di tiessût, tignût par bielece tal sachetin de gjachete:
a levin in place a metisi in mostre cul zigaret in bocje, il façolet tal sachetin de camisole (Pieri Menis, Une cotule pal dì de sagre)
Sin. façolet di sachete
-
s.m.
(fig.)
superficie une vore piçule, soredut di tiere:
nol ere tant grant il toc di siore Menie: un di chei façolets che a fuarce di divisions ereditariis e colin tes mans dai fîs (Domeni Zannier, La crete che no vai);
une [cjase] di chês rimodernadis: cusine, salute, dôs cjamaris e il bagn. Par daûr un façolet di curtîl (Gianni Gregoricchio, Trê feminis)
-
s.m.
[TS]
zûcs
zûc di fruts che dividûts in dôs schiriis a àn di cori a cjapâ par prins un façolet tignût di un zuiadôr tal mieç che al clame cubiis di aversariis
Proverbis:
- i façolets a puartin lagrimis