Dizionari de Lenghe Furlane

eterni  /-èr-/  e|ter|ni  [FO]

1. adi. cence principi ni fin, no limitât tal timp:  jo ti feveli dal se che al è eterni e imutabil, l'atmâ. […] In sumis l'assolût. Chel al è il se (Fabian Ros, Il lôf)
   Sin. cence fin , infinît , par simpri , eternâl
   
   1. che al à a ce fâ cu lis divinitâts, cuntune dimension metafisiche e sim.:  lei chiscj trê libris: un al ti dirà la paraula da veretâts eternis (Ugo Pellis, Catinuta)
   2. s.m. il diu de tradizion judaiche e cristiane o une altre divinitât:  o ai viodude, di fat, la sclavitût / dai miei fîs e des mês fiis / che ur à mandade l’Eterni (Antoni Beline (trad.), Biblie)
2. adi. che al à vût un principi ma nol varà mai fin, che al durarà par simpri:  i pâi des vîts a jerin vecjos, e Eliseo ur dave une sgorlade par viodi se a tignivin ancjemò. A jerin di acazie, come dî cuasi eternos (Carlo Sgorlon, Prime di sere)
   Sin. cence fin , imortâl , infinît , par simpri , perpetui , eternâl
   
   1. daûr de tradizion cristiane, che al sarà daspò la muart:  l'om al è predestinât in chel altri mont o ae danazion o ae salvece eterne (Fabian Ros, La invenzion dal stât); al sintive l'odôr di chês pinessis li dongje: l'odôr de pâs, de pâs eterne (Checo Tam, Lis pinessis)
3. adi. (iperb.) une vore lunc, che al somee che nol finissi mai:  si inzegnave a comedâ ancje svearinis e orlois, par cjapâsi un franc e passâ lis zornadis, chês zornadis eternis di Invier che no àn ni fin ni fonts (Antoni Beline, Pre Pitin); Jacum cu la eterne storie des sôs malatiis, ridot a pesâ cincuante chilos cu la clâf di cjase (Alan Brusini, Par stradis lungjis)
   Sin. infinît , interminabil , cence fin
4. adi. (fig.) che al vâl simpri, in dutis lis ocasions o situazions:  cheste e je la eterne maledizion des tieris di confin: di une bande la int che e presente la man vierte a chei di là; di chê altre la «patrie» che ur presente la cane de sclope (Josef Marchet, La man e la arme); la eterne scuse che l'om si cjate simpri: se no lu fâs jo, lu fâs un altri (Roberto Ongaro, Cretevierte)
   Sin. gjenerâl , assolût , solit¹
5. s.m. timp che al dure par simpri:  che [la politiche di Craxi] e ves il presint e il futûr al podeve dâsi; che e ves ancje l'eterni a podevin esisti dubis (Adrian Cescje, Memoriis di politiche linguistiche)
   Sin. eternitât

Polirematichis e espressions idiomatichis

• pari eterni loc.s.m.