Dizionari de Lenghe Furlane

infinît  in|fi|nît  [FO]

1. adi. che nol à limits, che nol à fin tal spazi:  [il cîl] al jere, lu savevi benon, nome spazi vueit e infinît tra une stele e chê altre (Carlo Sgorlon, Il dolfin)
   Sin. cence fin , sconfinât , disconfinât , ilimitât
   
   1. che nol à limits tal timp, che al dure par simpri:  nissun che al vegni a puartâni flours ta la tomba. I no sarìn muarts coma i nustris vecjus: ma scûr, tenebris, glas, un nuia. Un nuia par secui infinîts (Pier Paolo Pasolini, I Turcs tal Friûl); al è un timp infinît / che no sai / prime di me. / Al è un timp infinît / che no sai / dopo di me. / Tal mieç / il gno jessi tal mont (Galliano Zof, Jessi)
      Sin. eterni , ilimitât , cence fin
   2. che nol à limit di cuantitât:  no je tante diference jenfri trois infinîts e nissun troi (Mario Turello, Il brevet)
2. adi. (iperb.) une vore grant:  cuntune pazience infinide e recupere tocuts di tele di dute chê mont di peçots che a restin dismenteâts par agns tai scansei di cjase (Angelo Floramo, Storiis che a nassin di bleons e di maiis. Puartis viertis sui siums)
   Sin. cence fin , disconfinât , enormi , grandon , grandonon , ilimitât , imens , incomensurabil , spropositât , stragrant , fûr di misure , sconfinât , sterminât , badiâl
   
   1. di sintiment o sensazion, une vore profont:  e ca ta la anime un dolôr infinît… cetant che o ai patît… (Pieri Somede dai Marcs, Resurezion a Pontinie)
   2. che al è o che al somee une vore lunc tal timp:  le fissà tai voi, cul cûr in bocje, in chel minût infinît (Dino Virgili, La aghe da pît la cleve)
      Sin. eterni , che nol finìs plui , lunc , lungjon
   3. une vore grant di numar:  a passavin lis seradis a sculpî il len, a preparâ zeis e infinidis altris robis tipichis dal mont familiâr furlan (Piero Cargnelutti, Su lis alis di Gigi Maieron)
3. s.m. dome sing., spazi cence limits:  dut al passave, al lave dret e jê bessole, ferme, tun casel dispierdût tal infinît (Dino Virgili, La aghe da pît la cleve); chel che mi incjante di plui al è il sintiment dal spazi, dal infinît che o cjati e che o cîr ancje intai paisaçs dal Friûl (Cristina Cescutti, Poet dal paisaç)
   
   1. il dut e l'eterni fisic e metafisic:  no tu rivis a concepî l'infinît, parcè che nol è e nol pues jessi comprensibil dentri tun cjâf finît (Fabian Ros, Il lôf); fâsi lis grandis domandis sul sens profont dal nestri vivi e scombati, sul finît e sul infinît che al è tal mont e dentri di ognun di nô (Antoni Beline, L'an dal messâl)
   2. (meton.) il cîl tant che aspiet visibil dal univiers:  tra lis bestiis e la nature al si strenzeve come un pat di amôr e une letizie vierte e libare si spandeve pal celest dal infinît (Pieri Somede dai Marcs, Clâr e scûr)
4. s.m. [TS] mat. estrem ideâl dal valôr di une variabile o di une funzion che no àn limit tal lôr ingrandîsi o diminuîsi
5. adi., s.m. [TS] gram. categorie gramaticâl di mût indefinît de coniugazion verbâl dulà che la azion e je esprimude cence determinazion di numar o persone, ma dome di timp e di diatesi:  l'â finâl dai infinîts e dai nons derivâts dai infinîts al è lunc te pronunzie curade de coinè (Xavier Lamuela, La grafie furlane normalizade)