Dizionari de Lenghe Furlane

assolût  a|sso|lût  [AF]

1. adi. cence limits o vincui:  o sint une armonie complete. Al è un sintiment clâr, positîf, assolût (Franc Fari, Il cjâf dai furlans)
   Sin. incondizionât , ilimitât , totâl , complet
   
   1. che nol ven di une relazion proporzionâl o di altre sorte:  [in Val di Aran] la politiche linguistiche e à permetût di mantignî la proporzion di feveladôrs e e à fat cressi il lôr numar assolût di plui di mil personis (Xavier Lamuela, Une riflession su lis politichis linguistichis); une funzion statistiche elementâr e rigjave la frecuence assolude di un ciert fenomen (Vladimír Petkevič, trad. di Zorç Cadorin, Corpus linguistics)
   2. che al à caratar gjenerâl o universâl:  la art e il pinsîr che al veve esprimût il mont elenic a forin ricognossûts modei assolûts (Adrian Cescje, Memoriis di politiche linguistiche); si po sperâ di jessi bogns di superâ i contrascj che a puedin capitâ inte vite parcè che, par grancj che a sedin, no son mai il mâl assolût (Francesc Placerean, Crist resurît al colme dute la sperance dal om)
      Sin. generâl , universâl
   3. ancje dome par dâ plui fuarce a un concet:  [i ucieluts] a jerin tignûts come dêts madûrs e jo o vevi la proibizion assolude di svicinâmi (Nadia Ermacora, Il svuel dal Nani)
2. adi. [TS] polit. dal podê di un sovran, che nol à limits juridics e controi de bande di un parlament:  la nassite dal stât nazionâl […] e je la consecuence direte de Rivoluzion Francese, che in gracie di chê e ven a mancjâ la sovranitât assolude dal monarcje (Marc Stolf, Minorancis linguistichis)
   
   1. di sovran, che al à un podê no limitât:  ce che Locke al conteste e je la tesi assolutiste dal podê, la teorie di un societât rezude di un monarcje assolût (Fabian Ros, La invenzion dal stât)
   2. di regjim, che si fonde sul podê no limitât dal sovran
3. adi. [TS] sport di classifiche, titul o sim., che al derive dai ponts o dai valôrs calcolant ducj i concorints, cence tignî cont di divisions in categoriis o sezions:  une gare estreme che la udinese Elena Fabiani e cognòs benon, fuarte di un titul talian assolût (Erika Adami, Elena Fabiani, la ultramaratonete che e sfide i limits corint par 24 oris)
   
   1. s.m. tal pl., viôt campionâts assolûts
4. adi. [TS] gram. di une costruzion, che no à leams sintatics cul rest dal periodi:  [il teme sospindût] Moignet, pal francês di une volte, lu clame «nominatîf assolût» (Zorç Cadorin, Cualchi ipotesi sul furlan di prin di scrivilu)
   
   1. di verp, doprât cence il complement che, par solit, i ven daûr
5. s.m. [TS] filos. ancje cu la iniz. maiusc., ce che al esist di par se, che nol è condizionât e al è il fondament di dutis lis realtâts:  se Diu al è dut, l'Assolût e l'Infinît, nol po jessi nissun altri diu, parcè che fûr dal dut, dal assolût e dal infinît al è dome il nuie (Antoni Beline, La fabriche dai predis)