Dizionari de Lenghe Furlane

drete  /-è-/  dre|te  [FO]

1. s.f. direzion che e je a diestre, contrarie ae çampe:  a la prime crosere al voltà a drete (Franco Marchetta, Light my Fire); di drete a çampe, dal alt al bas [lis âfs] e 'simiavin cun tante furie, che il voli nol podeve stâur daûr (Catarine Percude, Lis âfs)
   Sin. diestre , man drete , man
   Cfr. çampe
   
   1. part politiche conservadore:  cheste e je stade une sielte dal partît democratic-cristian dai siei aleâts, e ancje de drete (Raimont di Strassolt, La autonomie dai "ex comuniscj"); la balotazion dai 7 di Mai e viodarà la estremiste di drete Marine Le Pen e il centrist Emmanuel Macron (Marc Stolf, Il disarmament di ETA e la promesse di Macron de ratifiche de Cjarte europeane)
2. s.f. man de bande diestre, che te plui part des personis e à plui fuarce e plui precision:  i da une patafade ae barete che al à sul cjâf cu la drete (Meni Ucel, I colaçs)
   Sin. man drete , diestre , man buine , man diestre
   Cfr. çampe
3. s.f. informazion, sugjeriment bon par fâ ben alc:  la saldadore a fîl che o vevi imparât a doprâ di bessôl, juste cun dôs dretis che mi veve dât Kosim (Igor Londero, Delit in vie del Lavoro); o ai presentât il lavôr al professôr Bepi Bergamin, e ancje lui mi à dât buinis dretis (Erika Adami, O ai scrit pal gno popul)
   Sin. consei , indicazion , informazion , soflade , sugjeriment

Polirematichis e espressions idiomatichis

• lâ drete loc.v.
• schene drete loc.s.f.

Proverbis:

• bust a ruviers e manie drete al è l'inzen da la pulzete