Dizionari de Lenghe Furlane

difusion  /-òn/  di|fu|si|on  [FO]

1. s.f. il fat di slargjâsi o jessi slargjât, di cjatâsi plui dispès o suntune zone plui grande:  la difusion di chest stîl di vite citadin al riscje di scancelâ dal dut la impronte culturâl e dal paisaç contadin (Rino Gubiani, Studi da la evoluzion dal paisaç mediant i toponims); altris sindicâts di mosaiciscj e teracîrs a nassin tai Stâts Unîts dopo de difusion e dal consolidament dal setôr tra i agns Dîs e Vincj dal Nûfcent (Javier Grossutti, La emigrazion dal Friûl - Vignesie Julie tai Stâts Unîts); la presince de lenghe furlane tai orghins di informazion, e massime te forme scrite, […] e jude po la difusion de alfabetizazion puartant fûr la lenghe furlane de suaze dome dal fevelâ (Erika Adami, La lenghe furlane tai mieçs di comunicazion)
   Sin. circolazion , comunicazion , divulgazion , espansion , proliferazion , propagazion , slargjament , trasmission
   
   1. passaç di un individui a un altri:  la vignude di chescj dispatriâts che a fasin domande di asîl no à fat cressi la difusion di malatiis infetivis (Guglielmo Pitzalis, Nissun pericul dai forescj)
      Sin. proliferazion , propagazion , slargjament , trasmission
   2. il fat di mandâ o di jessi mandât par radio, par television, in internet e v.i.:  vendite dai dirits pe difusion televisive ancje sul marcjât internazionâl (Fabian Ros, Âf Blu)
      Sin. emission , trasmission
   3. il jessi presint intune cierte frecuence, cuantitât e in ciertis posizions:  il furlan al à une difusion cence confront plui largje [rispiet al ladin des Dolomitis] (Josef Marchet, Autonomie e lengaç)
   4. il jessi comun, cognossût, facil di cjatâ:  i trê sistemis operatîfs par pc cun plui difusion a son Windows, Mac OS e Linux
   5. il jessi doprât o condividût a larc:  pagjinis furlanis scritis netis di masse diacritics come che al vâl pes lenghis ricognossudis e di grande difusion (Adrian Cescje, Memoriis di politiche linguistiche); il comun […] al favorìs ativitâts culturâls e informativis pe difusion di une culture di pâs (Aministrazion Publiche, Statût dal Comun di Udin)
   6. di un prodot, presince tai ponts di vendite o sim. e facilitât di jessi cjatât:  al è une vore negatîf il faliment de esperience di Il Diari, che al jere rivât a vê une buine cualitât e difusion (Sandri Carrozzo, La politiche pe lenghe furlane: risultâts de ultime aministrazion regjonâl in Friûl-VJ e propuestis pal avignî)
      Sin. distribuzion
2. s.f. propagazion intal spazi:  la difusion di un sun intal aiar
3. s.f. [TS] chim., fis. moviment o traspuart di materie par vie di gradients diferents:  l'azot in pression dentri la ampole al impedive, par un principi fisic statistic, al ossigjen di jentrâ dentri il volum de ampole o almancul di rindi plui lente la difusion (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât)
4. s.f. [TS] fis. fenomen che si à cuant che un rai di lûs, passant par une cierte superficie o traviers di un mieç particolâr, al ven rimandât in dutis lis direzions:  come tal câs de difusion, la lûs laser e ven rifletude in maniere diferente cuant che si le fâs incidi su di un mieç rifratôr (Marisa Michelini, Alberto Stefanel, La polarizazion de lûs)
5. s.f. [TS] fis. in fluidodinamiche, passaç di un fluit par un difusôr in mût di trasformâ la sô energjie cinetiche in pression
6. s.f. [TS] antrop. slargjament di un fenomen nassût intune piçule zone intune aree plui grande, par vie di migrazions e di imitazion:  o viodìn ae fin dal IV mileni p. di C., la difusion de culture "ocidentâl" di Lagozza che a ven de Lombardie (Andrea Pessina, Gaetano Vinciguerra, La preistorie in Friûl)
7. s.f. [TS] econ. distribuzion di une ricjece, capitâl o redit tra un numar alt di sogjets, al contrari di ce che al sucêt cu la concentrazion
   Sin. deconcentrazion