Dizionari de Lenghe Furlane

comunicazion  /-òn/  co|mu|ni|ca|zi|on  [FO]

1. s.f. at dal fâ savê, dal dâ o dal ricevi informazions, istruzions e v.i.:  si è rivâts a stabilî une comunicazion cun malâts che si crodeve a fossin in stât vegjetatîf persistent ma che invezit a jerin in stât di cussience minime (Franc Fari, La evoluzion dal çurviel e de cussience tai vertebrâts); a son stadis fatis dôs ipotesis su la origjin dal lengaç. La prime e je in relazion cu lis vocalizazions dai animâi, la seconde cu la comunicazion gjestuâl (Giacomo Rizzolatti, Laila Craighero, Speculazions su la origjin dal lengaç)
2. s.f. il contignût che al ven fat savê o il so supuart, in gjenar di cjarte:  il casanovist al à ancje di stâ daûr aes rivistis, là che ducj i studiôs dal mont si passin informazions e comunicazions (Pierluigi Visintin, Friûl e furlans te Histoire de ma vie di Giacomo Casanova); i tais tal belanç decidûts dal Guvier talian pal 2006 a àn puartât a sbassâ dal 40% i bêçs pe ferovie Udin - Cividât. La comunicazion e rive dal assessôr regjonâl pai traspuarts (Redazion Radio Onde Furlane, Tais pe ferovie Udin - Cividât)
   Sin. messaç , letare ipon. , mes¹
   
   1. contribût, intervent di un academic intune cunvigne e test publicât tai ats di chê cunvigne o intune riviste:  il program denominât Progjets pilote di educazion bi-plurilengâl inte scuele de infanzie e primarie, ogjet di cheste comunicazion, al è stât realizât li dal Centri Interdipartimentâl di ricercje su la culture e la lenghe dal Friûl - CIRF (Alessandra Burelli, Educazion plurilengâl tes scuelis furlanis); cheste comunicazion e vûl dâur part ai studiôs che al è chel materiâl a lôr disposizion e al vûl ufrîur une prime descrizion (Zorç Cadorin, Doi autografs di Toni Broili framieç dai manuscrits furlans di Berlin conservâts a Cracovie)
3. s.f. capacitât di passâ informazions, istruzions e v.i. in maniere che si capissin, o ancje sensazions, emozions e v.i. in maniere che a sedin sintudis a plen:  al sa lis robis ma nol à une buine comunicazion
   Sin. comunicative
4. s.f. setôr, ativitât, dissipline che e cîr di fâ rivâ messaçs te maniere plui efetive:  inte comunicazion di marcjât al è plui impuartant il lengaç simbolic di pocjis peraulis, tantis figuris, segns e suns in rapide frecuence (Franco Rosa, Lenghe e sielte de alimentazion di bande dal consumadôr); lis aziendis furlanis, fiis de praticitât furlane pluitost ruspiose, clopino un pôc te comunicazion? (Dree Venier, Giannola Nonino: une rivoluzion partide des lidrîs)
5. s.f. setôr, ativitât di passaç di messaçs, informazions e v.i. traviers di mieçs di masse tant che gjornâi, radio, television, internet e v.i.:  intal setôr des comunicazions e je stade la esplosion di Internet e, plui di resint e forsit ancjemò plui significative pe int di dut il planete, de telefonie celulâr (Max Mauro, Un Friûl difarent: i 90 mhz di Onde Furlane); al è impuartanton che i operadôrs de comunicazion a vedin une competence linguistiche alte (Erika Adami, La lenghe furlane tai mieçs di comunicazion)
6. s.f. il fevelâ o il jessi in dialic cuntun cualsisei mieç:  bisugne cognossi l'inglês ma no pensâ che cun cheste lenghe si vedi risolt par simpri il probleme de comunicazion a nivel internazionâl (Franc Fari, Il cjâf dai furlans); il model monolengâl talian, o chel bilengâl talian/inglês no corispuindin par nuie aes dibisugnis di comunicazion concrete dai citadins furlans, stant che a limitin une vore la profonditât di comunicazion dentri dai confins dal Friûl e a permetin dome une comunicazion une vore superficiâl, o no le permetin propit, tes zonis a pene fûr dai confins dal Friûl (Sandri Carrozzo, Pseudopragmatisim linguistic)
7. s.f. colegament jenfri un lûc e un altri, passaç:  il plan tiere e il prin plan de cjase a son in comunicazion dome par vie di une scjale che e je difûr e che e mene tal puiûl
8. s.f. massime tal pl., dutis lis struturis di traspuart che a metin in colegament un puest cuntun altri:  par vie dal siopar dai controlôrs di svol si previodin problemis tes comunicazions aeriis ; cressint la rêt des comunicazions par tiere, par flum e par mâr, la creazion di puarts su la cueste e indentri tal teritori, e plui di dut cul cjapâ fuarce dal puart fluviâl di Aquilee, dal sigûr a son deventâts plui fis i rapuarts cu lis regjons di là des Alps e danubianis, par esempli il Noric e la Panonie, e cun chês mediteraniis (Mirta Faleschini, Stefano Magnani, Aldo Candussio, Gaetano Vinciguerra, Protostorie e storie romane in Friûl)
   Sin. traspuart