Dizionari de Lenghe Furlane

classic  /-à-/  cla|ssic  [FO]

1. adi. de antichitât greghe e romane, cjapade tant che model di art, culture, filosofie e v.i.:  fûr dal continent, i unics che a savevin alc, che a savevin lei e scrivi e che a jerin in grât di conservâ un tic di culture classiche, a vignivin de Scozie e da la Irlande parcè che a jerin i unics puescj dulà che i barbars no jerin rivâts (Francesc Placerean, La nestre storie); la leterature greghe no si pues imagjinâ cence Omêr, e te stesse misure no si pues imagjinâ la leterature latine cence chê greghe e nancje la leterature europeane cence i modei classics (Sandri Carrozzo, Pierluigi Visintin, Jentrade de Odissee)
   Sin. antîc
2. adi. che al rive ai nivei culturâi e artistics considerâts plui alts di une cierte dissipline, di une cierte zone, di une cierte ete e v.i.:  Tolstoj al è un dai autôrs classics de narative russe
   Sin. miôr
   
   1. di musiche, componiment o musicist, cult, che al fâs riferiment ae tradizion, cun intindiment artistic che al vûl diferenziâsi de musiche popolâr e di chê comerciâl:  nuie disco music su Onde Furlane, par chel si pues sintonizâsi su lis tantis radios comerciâls. Si trasmet rock di avanvuardie, progressive, la new wave, il punk, ma a son ancje spazis pe musiche jazz e par chê classiche (Max Mauro, Un Friûl difarent: i 90 mhz di Onde Furlane); al coventave un pianist ae altece de situazion e o ai ingaiât Matteo Andri, un musicist di grant valôr di formazion classiche (Erika Adami, "Amôrs" in musiche)
3. adi. di artist, opare, stîl e v.i., che si considere esemplâr:  il presi plui alt di chescj doi libruts, alore, al va cirût inte lenghe, lenghe frescje e vivarose. Lenghe classiche, pure (Laurin Zuan Nardin, La scuele di Marchet); Nievo, parint dai siôrs di Colorêt, al scrivè juste achì une buine part des sôs "Confessioni", un dai romançs "classics" de leteradure italiane dal Votcent (Agnul di Spere, Colorêt)
   Sin. canonic , esemplâr
4. adi. di impostazion dissiplinâr o teorie, fondade suntune sistematizazion che e je chê di riferiment, spec. a pet di indreçaments plui modernis:  il mût di lâ indenant al è di stamp sientific classic cuntun moment di racuelte des informazions, un moment di analisi, un di sintesi e un di risultâts (Rino Gubiani, Studi da la evoluzion dal paisaç mediant i toponims); o tratarìn plui in detai la notazion des POS [parts dal discors] e de morfologjie tant che notazion linguistiche classiche (Vladimír Petkevič, trad. di Zorç Cadorin, Corpus linguistics)
   Sin. tradizionâl
5. adi. (fig.) che al va daûr di un stîl, di une elegance che al ven di une lungje tradizion, cence grande inovazion o sperimentazion, ancje in funzion av.:  pai oms al va plui il model classic, pes feminis invezit al è di dut e di plui: scarpets cu la tele jeans, a forme di balarinis, cui lustrins… (Marta Vezzi, La ‘fabriche’ dai scarpets di Antonella)
   Sin. tradizionâl
6. adi. che al pues jessi tignût di esempli tipic di une categorie, o che al è leât par antonomasie a cdn., a alc, a un lûc, a une situazion e v.i.:  a ordenarin dôs biris: la classiche London Pride par Arcjan e une plui lizere Chiswick Bitter par Saveri (Franco Marchetta, Il numar 1089)
   Sin. tipic , carateristic
   
   1. che al è propri di alc o di cdn. che lu caraterize:  jo fra ducj, jo sôl, puar diaul, / sut la gole, a bocje zune, / passi Autun cjalant la lune / cul mio classic canocjâl (Pieri Çorut, Lis vendemis)
      Sin. solit¹
7. adi. (scherç., iron.) che al è cussì particolâr che al merete di jessi ricuardât, contât e v.i., soredut par vie che al fâs ridi:  "Eh! sin ben plantâts sì! Par furtune che cualchi volte si rît: a 'nt capite di classichis" (Vittorio Vittorello, A ogni cost); la plui classiche però e fo cuant che i cjapà lis clâfs de jespe e al le a soterâjes tun cjamp. Il capelan al jere disperât che nol podeve movisi e chel altri al dineave (Antoni Beline, Pre Pitin)
   Sin. famôs
8. s.m. artist o opare cjapâts di model par un stîl o par une ete:  l'esercizi di voltâ par furlan classics di lenghis che a àn une lungje e alte tradizion leterarie al è une biele sfide (Walter Tomada, Pierluigi Cappello: «L’om plui concret? Il poete»); une opare e je un classic cuant che e covente inte stesse maniere ai nestris vons, a noaltris e a chei che a vignaran dopo di nô (Fabian Ros, Interviste cun Ignacio Vilar)
9. s.m. spec. tal pl., i autôrs latins e grêcs plui innomenâts:  chestis traduzions, o miôr chescj travistiments leteraris dai classics a jerin di mode dal Sietcent, baste pensâ al nestri Busiç, che al à voltât par furlan in otavis dut Virgjili (Pierluigi Visintin, Friûl e furlans te Histoire de ma vie di Giacomo Casanova)
10. s.m. ce che si calcole di tipic:  il frico al è un classic de cusine tradizionâl
11. s.m. ce che al è cognossût e preseât di ducj:  il zûc de ocje al è un classic, simpri divertent e coinvolzent te sô semplicitât, tes sôs cetantis variantis (Erika Adami, Il zûc de ocje in lenghe)
    
    1. ce che si use a fâ:  par Pasche, i ûfs di cjocolate a son un classic
12. s.m. [CO, TS] scol. viôt liceu classic :  dopo finidis lis mediis nol sa ben se fâ il classic o il sientific