Dizionari de Lenghe Furlane

cjatîf  cja|tîf  [CO]

1. adi., s.m. che, cui che al fâs il mâl di pueste:  Signôr, no stait a metimi / nel numar dei cjatîfs, / che vivin come bestiis / del sanc dei vuestris fîs (Zuan Batiste Galeri, Il furlan a messe)
   Sin. trist
   
   1. che al è fat par fâ mâl:  "Sù, sù pardiane! … Tu sâs che o soi bon nome di scherçâ jo, sence fâ cjativis azions!" (Arturo Feruglio, In cîl e je une stele!…)
      Sin. mâl , brut
   2. che al mostre intenzion di fâ mâl
   3. ancje di alc di inanimât, ma che al pues jessi personificât, negatîf, che al fâs dam:  se il mont l'è stât cjatîf e injust cun me / e al à paiât il ben che o ai fat cul mâl, / no jê reson di disperâsi avuâl (Zuan Lurinçon, Chest grant vaî)
   4. che al à agonisim agressîf
   5. che, cui che al è une vore determinât e intransigjent
2. adi. di animâl, agressîf o pericolôs
   Sin. trist
3. adi., s.m. di frut, che nol ubidìs, che no si compuarte ben:  «In jet - tu ur zigaris – cjativats» (Argeo, I doi fruts); ai i ans / de un nin / che la mestra / à trat davour la lavagna / parcè che al era / cjatîf e brut (Federico Tavan, No stei domandâme cetancj ans che ai)
   Sin. trist
4. adi. negatîf, che al è indreçât al mâl:  al fâs nome dams e al dissipe i zovins cul cjatîf esempli (Roberto Ongaro, Cretevierte)
   Sin. brut , mâl , trist
   
   1. che al mostre aspiets contraris a ce che al è ben, bon, biel e v.i.:  puar vecjo! al veve une cjative ciere (Pieri Corvat, El cuarantevot)
5. adi. cun carateristichis negativis, cun pocje capacitât, cualitât:  si àn azardât di orê erizi su li ruìnis di un cjatîf ordin sociâl un altri miôr (Achil Telin, La Patrie Ladine, I, 1); la colpe de cjative aministrazion (Josef Marchet, No sin contents!)
   Sin. trist , scart¹
6. adi. che nol plâs di savôr, odôr e v.i.:  o ai te lenghe / un savôr cjatîf di solfar (Eugjeni Marcuç, Ploie in plance dal gran); "Ti parial che buti fûr cjatîf odôr, la mê bocje?" (Arturo Feruglio, El leon re)
   Sin. brut , trist , ledrôs , mâl
   
   1. s.m. odôr o savôr che nol plâs:  e bon sarà par me dut il cjatîf (Ermes di Colorêt, I, 150)
7. adi. che al è contrari, svantazôs, che al fâs dam o che che al fâs vuadagnâ pôc, che nol à carateristichis positivis e v.i.:  pronosticâ / timp bon o timp cjatîf (Pieri Çorut, Il Strolic furlan par l'an 1852); «Miôr puartâsi daûr une cjavrute vive; o varìn il lat fresc, anzit cjalt. No je une cjative idee» (Alan Brusini, Un dai pôcs)
   Sin. trist , ledrôs , brut
8. adi. [TS] med. di malatie o lesion, che e je grave, e va in piês e si slargje tal organisim
   Sin. trist
9. s.m. dome tal sing., la part negative di alc
   Sin. mâl , brut

Proverbis:

• bielis peraulis e cjatîfs fats a incjanin savis e mats
• bon scuedidôr, cjatîf paiadôr
• cuant che i fruts a stan cuiets, al è cjatîf segn
• i cjatîfs: cjapâju cuant che a vegnin e lassâju lâ cuant che a van
• la cjative jerbe e cres prest
• milantadôrs, cjatîfs paiadôrs