Dizionari de Lenghe Furlane

cjamare  /cjà-/  cja|ma|re  [FO]

1. s.f. spazi di une cjase che al è separât di chei altris cui mûrs e che al comuniche cun chei altris cun puartis e coridôrs:  un apartament cuntune cusine, doi bagns e trê cjamaris, che si puedin doprâ par durmî o di sale o di mezât; une cjasone salde, di piere, cheste dai Pascuts, di trê plans, se si met intal cont ancje il cjast. (In dì di vuê, là sù, i gjavaressin fûr almancul trê cjamaris) (Gianni Gregoricchio, Trê feminis); agne Menie invezit e veve cjolt un vasut di canele e une pivide di sclopon par meti sul barcon de cjamare là che e filave (Pieri Menis, Chei di Muraie)
   Sin. locâl , stanzie
   Cfr. cjase
2. s.f. stanzie di une cjase destinade a durmî:  a vuere finide, par maridâsi, al varès fat la cjase te stale e tal toglât; sot: cusine, tinel e lis scjalis e parsore dôs cjamaris e une stanzie di bagn (Roberto Ongaro, Il muc); al stentave inmò a ripiâsi di une polmonite che lu tignive sierât in cjamare (Pieri Somede dai Marcs, 11 di Fevrâr 1929)
   
   1. complès dai mobii che a furnissin chê stanzie:  al à comprade une cjamare di cocolâr clâr; cun trê breons di peç, doi cavalets e un paion sglonf di scus di panole, i vevin cumbinade la cjamare (Alan Brusini, Come tai romançs)
3. s.f. stanzie dulà che si duar, in câs ancje cun bagn, dade a fit:  Begot al veve poiât lis valîs te cjamare dal hôtel di chê isule incantesemade li che al varès passât lis vacancis (Fabian Ros, La rambe); e jere une cjase isolade, fûr di man, di une vedue che e fitave cjamaris par zontâsi alc ae pension che i veve lassade l'om (Alan Brusini, Gian Paolo Linda, I forescj)
   
   1. stanzie dulà che si sta, in struturis di cure, di assistence e v.i.:  cumò fûr pal barcon de cjamare dal ospedâl si viodeve passâ int, un moment si imbarive e un moment si srarive, tal vialut cui pins blancs (Agnul di Spere, I prâts des Savodagnis)
4. s.f. tal pl., ognidune des dôs assembleis di un parlament a dôs cjamaris:  l'ufici di conseîr regjonâl nol è compatibil cun chel di membri di une des Cjamaris (Aministrazion Publiche, Statût Speciâl de Regjon Autonome Friûl-Vignesie Julie)
   Cfr. parlament , cjamare dai deputâts , senât , cjamare alte , cjamare basse
   
   1. (par anton.) la Cjamare dai Deputâts o la Cjamare Basse:  ai 20 di Lui dal stes an [1921], Tuntar al denunzie ancjemò une volte ae Cjamare la violence cuintri des popolazions de Vignesie Julie tun dramatic discors, dispès interot dai vosaments e dai insults dai deputâts de Diestre (Carli Pup, La seconde Irlande); tal câs des elezions pe Cjamare e pal Senât, i citadins no puedin sielzi il candidât che a àn miôr, par vie che l'ordin al è stât za decidût dai partîts (Comitât 482, Pai dirits linguistics in Friûl - Vignesie Julie 2008-2013)
5. s.f. [TS] tecn. locâl de fornâs li che si metin i modons o altri materiâl crût par cueilu:  al jentrave, in chês cjamaris [de fornâs] in file, par cjalâ se il modon al jere ben intassât, se lis puartis a jerin ben stropadis (Maria Forte, La tiere di Lansing); i prenars a jentravin te cjamare infogade cuntun peçot imbombât di aghe sù pe muse, e cu lis sapis a gjavavin fûr il modon (Dino Virgili, La aghe da pît la cleve)
   
   1. cuantitât di materiâl che e sta intun di chei locâi:  dôs cjamaris di materiâl (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
6. s.f. [TS] tecn. locâl di un implant o di une struture, vueit e che si pues jemplâ e sierâ, destinât a une cierte funzion:  une struture primarie di contigniment (Primary Containment Vessel - PCV) che e je fate di une cjamare sute a forme di bulbi di açâl (Alessandro Pascolini, Il disastri de centrâl nucleâr di Fukushima Dai-ichi)
7. s.f. [CO, TS] fotogr., inform. aparât fotografic, ancje cumbinât cun dispositîfs informatics, par cjapâ imagjins o videos:  un sisteme Terrestrial Laser Scanner (TLS) integrât cuntune cjamare fotogrametriche (Domenico Visintini, Lis Termis Romanis e la Basiliche Patriarcjâl di Aquilee studiadis midiant lis modernis tecnichis di rilevament e di rapresentazion)
   Sin. fotocjamare , videocjamare
8. s.f. [FÛ, TS] amin., stor. orghin fiscâl e aministratîf sot de Austrie, sot Vignesie e tal Patriarcjât
   Sin. cjamare fiscâl
   Var. cjamire
   Cfr. cjamerâr

Polirematichis e espressions idiomatichis

• cjamare dai forescj loc.s.f.

Proverbis:

• cui che al à di maridâsi a carnevâl, di avent che al prepari la cjamare