Dizionari de Lenghe Furlane

cjalâsi  cja|lâ|si  [FO]

1. v.pron.tr., v.pron.intr. viôt cjalâ
2. v.pron.intr. smirâ cun atenzion e a lunc la sô imagjin, a riflès o riprodote:  simpri plui a lunc Eve si cjalave tal spieli de so cjamare, cirint di induvinâ te sô muse i trats de sô personalitât e dal so destin (Carlo Sgorlon, Ombris tal infinît)
   Sin. smirâsi , spiâsi , spieglâsi , viodisi , rimirâsi
   
   1. (fig.) rifletisi:  i cjamps a sverdearin di colp fin sul ôr dal palût e il forment verdut si pleave a cjalâsi ta la aghe (Dino Virgili, Cuel Valâr)
3. v.pron.intr. osservâsi un cun chel altri:  si saludarin dibot cence fevelâ, cjalantsi e avonde (Agnul di Spere, In viaç di domenie); Begot al tornâ a cjalâsi cul so coleghe, po al stazà il lûc, al tacà a lâ sù e jù sot des vogladis dal personâl (Fabian Ros, La rambe)
   Sin. fissâsi , osservâsi , lumâsi , spiâsi
4. v.pron.tr. osservâ une part dal propri cuarp:  cjalâsi lis mans; cjaliti i cjavei che a comencin a sblancjâsi, no viodistu che tu ti sfadiis nome a fâ cheste rivute? (Pieri Menis, Sul agâr)
   Sin. controlâsi , esaminâsi , osservâsi
5. v.pron.tr. cun valôr intensîf, cjalâ cun atenzion, cun gust:  cjalâsi un biel film; si jere fermade a cjalâsi chê valade grandone e verde (Alan Brusini, Come tai romançs)
   Sin. viodisi
6. v.pron.intr. judicâ se stes, fâ autocritiche, fâ un esam di cussience:  e tu, Vigji, no stâ voltâti indaûr a cjalâlu, che tu âs ce cjalâti te: che la cantine plene e la femine cjoche no puedin lâ da pâr, nancje là di te, no mo? (Josef Marchet, Lis predicjis dal muini)
7. v.pron.intr. dâsi atenzion un cul altri, vê un contat sociâl:  a àn barufât e no si son cjalâts par une setemane
8. v.pron.intr. tignîsi sul sigûr rispiet a un pericul o a alc di negatîf:  cjaliti di chê int alì, che nol è ce fidâsi
   Sin. vuardâsi , stâ in vuaite
9. v.pron.intr. evitâ, stâ atent di no fâ alc:  se i grancj a vivin cun vergogne la identitât furlane i fruts, ancje se a impararan a scuele il furlan, si cjalaran ben dal doprâlu (Franc Fari, Il cjâf dai furlans)
   Sin. tignîsi , vuardâsi
10. v.pron.intr. (fig.) di edificis o di lôr parts o di monts, culinis, paîs e altris elements, jessi un devant di chel altri:  il municipi e la glesie si cjalin, un di une bande, une di chê altre de place dal paîs

Polirematichis e espressions idiomatichis

• podê cjalâsi tal spieli loc.v.

Proverbis:

• intant che la biele si cjale tal spieli, la brute si maride
• par consolâsi baste cjalâsi indaûr
• se tu ti cjalis te, no ti vanze timp di cjalâmi me