Dizionari de Lenghe Furlane

svicinâsi  svi|ci|nâ|si  [AF]

1. v.pron.intr. lâ dongje:  un contadin al cuche fra lûs e scûr un bossul di feminis che si cisichin fra di lôr. Si svicine biel plan in scuindon, e lis sint a fevelâ di un viaç (Luigi Gortani, Un paîs misteriôs); si dîs che cuant che si svicinave Atile, tancj siôrs che a jerin a stâ tai paîs de Basse che a son stâts brusâts, a vedin scuindût tesaurs di monedis di aur in cualchi poç (Sandri Carrozzo, Friûl di Magance)
   Sin. sdongjâsi , fâsi incà , lâ dongje , tirâsi incà , vignî dongje , vignî incà , fâsi sot , vignî sot , vicinâsi , prossimâsi
   
   1. rivâ a jessi dongje tal timp:  il svicinâsi de gnove edizion dal premi Sant Simon, al puartarà ancje chest an a domandâsi cuâl che al è il stât di salût des letaris furlanis (Maurizio Biasizzo, 50 sfumaduris di… "zâl e blu"); il timp de fin dal mont si svicine (Angelo Floramo, Papis e antipapis. Cividât, 1409. L’omaç dal Concili a Gregori XII)
2. v.pron.intr. someâsi o cjapâ plui elements di soemeance o podê jessi comparât cun alc o cun cdn. par caratar, cualitât, nivel e v.i.:  un furlan che si svicine a chel che cumò al ven clamât coinè (Cristina Cescutti, Leterature furlane)
   Sin. vicinâsi , sdongjâsi
   
   1. rivâ dongje di un ciert risultât, di une cierte cuantitât, entitât e v.i.:  la entitât reâl dal fenomen e pues svicinâsi aes 100.000 unitâts (Gian Carlo Bertuzzi, Storie de emigrazion regjonâl)
3. v.pron.intr. (fig.) tacâ a studiâ, a fâ, a interessâsi di alc:  chescj esemplis a son la dimostrazion che une gnove gjenerazion si svicinave aes tematichis dal autonomisim (Max Mauro, Un Friûl difarent: i 90 mhz di Onde Furlane); lui al è prin di dut un grant poete e un poete dramatic e duncje bisugne svicinâsi a lui pal troi de estetiche (Antoni Beline, Turoldo e il so Friûl)
   Sin. vicinâsi , sdongjâsi
4. v.pron.intr. (fig.) cjapâ pratiche, confidence, simpatie e v.i. cun cdn. o cun alc:  une maniere par svicinâsi a la int e fâ viodi che ancje une aziende multinazionâl dulà che si dopre l'inglês par comunicâ, e pues doprâ la lenghe fevelade de int (Dree Venier, La braùre… di jessi stupits!)
   Sin. vicinâsi , sdongjâsi
   
   1. tacâ a vê afinitât, a jessi in cunvigne cun alc o cun cdn.:  Gaismair al rive a scjampâ in Svuizare là che si svicine al riformadôr protestant Ulrich Zwingli (Carli Pup, Teritoris - Oms di Libertât)
5. v.pron.tr. puartâ, meti o fâ rivâ alc o cdn. dongje di se stes
   Sin. vicinâsi , sdongjâsi