stagjon
/-òn/
sta|gjon
[FO]
-
s.f.
ognidune des cuatri dadis di trê mês di un an solâr, dividudis une di chê altre dai solstizis e dai ecuinozis:
la cumbinazion fra il moviment di rivoluzion, chel di rotazion e la inclinazion de eclitiche a produsin il fenomen des stagjons (Nando Patat, Archeoastronomie in Friûl);
la int che e praticave la ostarie e mudave di numar e di cualitât daûr lis stagjons: di Istât, pôcs aventôrs e intimpâts, […] di Invier, invezit, il landri si incolmenave di int (Roberto Ongaro, Cretevierte)
Var. sason
, seson
, stason
-
s.f.
dade dal an caraterizade di cundizions atmosferichis e meteorologjichis particolârs:
e jere la vilie di Sant Andree, la stagjon des ploiis (Catarine Percude, La mulinarie);
al scriveva puisiis par scantinâ la aria suturna che a glutiva ducj massima ta li stagjons lungji dal freit (Novella Cantarutti, Foucs)
-
s.f.
periodi dal an dedicât a ciertis ativitâts agriculis, economichis, culturâls, o cuant che a madressin ciertis pomis o a son cierts prodots:
e jere stagjon di seselâ forment (Andreina Nicoloso Ciceri, I stupits - Racconti popolari friulani I);
pre Checo al è daûr a meti in ordin il rocul, che la stagjon di oselâ si vierzarà ca di un mês, nancje (Adrian Cescje, Memoriis di politiche linguistiche);
al jere tornât il cjalt, la stagjon dai fens (Dino Virgili, La massarie);
finide la stagjon dal teatro, come il solit, o ai fat preparâ te sale grande da la ostarie de «Cjampane» une cenute pai atôrs (Pieri Somede dai Marcs, La comedie dal mus)
Sin. timp
-
(par anton.)
anade agricule:
i rispuindeve subit letaris lungjis; e i contave dut dal paîs, de stagjon, dai lavôrs (Riedo Pup, Dreute)
-
lavôr che al dure dome une part dal an e che pal solit si fâs lontan di cjase, timp che al dure chel lavôr e sume di bêçs che al rint:
Milio i stave daûr ae Taresie, e al lave a cjatâle in cjase vie pal Invier cuant che al vignive a passâ chei trê mês a Biliris dopo la stagjon in Gjermanie (Meni Ucel, Culumie);
dopo di vê fate la stagjon su la fornâs, un al cîr di vuadagnâsi un franc ancje vie pal Invier (Roberto Ongaro, Cretevierte);
l'om al tornave a cjase pal Invier, cu la «stagjon» sudade e ingrumade centesim su centesim (Francesc Placerean, Cuintristorie dal Friûl dal 1866 fint in dì di vuê)
-
[TS]
sport
timp che al dure un campionât che si fâs ogni an, ancje a cjaval jenfri doi agns solârs:
te stagjon 61-62 o ai fat lis ultimis 4 partidis in serie A (Christian Romanin, Dino Zoff: «O vin lidrîs buinis, o vin di tignîlis di cont»)
-
s.f.
la Vierte e l'Istât:
par me la stagjon a era la prima pestela; a bisugnava che la cjera a sclopàs e che i fos buna da recuei chel sclop ta li mans, par dî che l'Uvier al era zût (Novella Cantarutti, Pesteli)
Sin. biele stagjon
-
s.f.
(fig.)
dade di timp che e je une frazion di un timp ancje une vore plui lunc di un an, par esempli frazion de vite o de storie:
ricuardâ a se stes che al veve cuarantecinc agns, che al jere maridât e che la stagjon dai ingrisui su la piel e jere passade, par lui, di un biel pieç (Franca Mainardis, Il sium di Lissandri);
"E ce àno otignût [chei de vecje gjenerazion] cul pestâ e fruçâ… la nestre e je une altre stagjon, sì, cun altris manieris si devi otignî chel che al è just […]" (Pieri Somede dai Marcs, Un pugn di moscjis);
cu la jentrade tai agns novante une stagjon fondamentâl si jere sierade par Onde Furlane, intant che la societât furlane e jere daûr a cambiâ muse (Max Mauro, Un Friûl difarent: i 90 mhz di Onde Furlane)
Sin. pagjine
, cjapitul
Polirematichis e espressions idiomatichis
Proverbis:
- cjapon di ogni stagjon
- e vâl plui une ploie te sô stagjon che no un tesaur buzaron
- i mats no àn stagjon ni di Istât ni di Invier
- il cjapon al è bon di ogni stagjon
- il diaul nol mancje la stagjon
- la stagjon e va ben avonde fin che il timp le seconde
- ogni flôr te sô stagjon
- ogni frut te sô stagjon
- ogni pome te sô stagjon
- ogni robe te sô stagjon
- ogni semeneson a la sô stagjon
- vin, femine e morons a van gjoldûts te lôr stagjon