Dizionari de Lenghe Furlane

cjapitul  /-ì-/  cja|pi|tul  [FO]

1. s.m. ognidune des parts, plui o mancul lungjis, di un libri, di une conte, di un scrit e v.i.:  lis primis peraulis che o ai scrit di chest libri a son stadis par furlan e a son chês dal incipit di chel che al è deventât il tierç cjapitul: e je la clamade che o ai vût cun Beppino Englaro cuant che al jere di lâ a cjoli Eluana (Christian Romanin, Amato De Monte: Il Friûl, patrie des bataiis di civiltât); chest cjapitul lu ai scrit par cirî di dîus che alc si vuadagne e alc si piert tal fevelâ dome une lenghe o plui di une lenghe (Franc Fari, Il cjâf dai furlans); al jevà e al cjapà sù un libri che al jere sul scabel dongje dal jet. […] Al tornà a poiâsi jù, lu vierzè al prin cjapitul e al tacà a lei (Amedeo Giacomini, Tal ospedâl)
2. s.m. part di un at, di une norme, di un contrat, di une convenzion e v.i.:  la vere part di novitât de 29 e je tal so cjapitul tierç, che al rivuarde la istruzion, la presince de lenghe furlane tes scuelis dal teritori furlan (Adrian Cescje, Memoriis di politiche linguistiche)
3. s.m. timp particolâr, fase di une vite, di une storie:  li, pal puar vieli, si sierave un cjapitul si vierzeve un altri, fat di zornadis lungjis e di plui lungjis gnots (Franca Mainardis, Aiar di cjase)
   Sin. fase , periodi , dade , dade di timp , aspiet¹
   
   1. part specifiche rispiet a une dinamiche, a un complès plui grant:  un fat che par sigûr, almancul in chescj agns, al jude il "sucès publicitari" di Onde Furlane a son i spots, i messaçs publicitaris. Al è un cjapitul singolâr inte storie de radio e, sul plan dal ûs e de promozion de lenghe, in cualchi maniere straordenari (Max Mauro, Un Friûl difarent: i 90 mhz di Onde Furlane)
      Sin. aspiet¹
4. s.m. [TS] dir.can., stor. assemblee di cjalunis indotade di personalitât juridiche e di capacitât normative:  lu àn propit disfat e la Bole e je tremende! Parcè che e bute jù par simpri il titul di patriarcje, il cjapitul di Aquilee, i dirits di diocesi e di metropolite (Francesc Placerean, L'ultin patriarcje: Denêl Dolfin)

Polirematichis e espressions idiomatichis

• vê vôs in cjapitul loc.v.