sere1
/sè-/
se|re
[FO]
-
s.f.
part de zornade che e corispuint aes ultimis oris di lûs e aes primis oris di scûr o aes ultimis oris dal dopomisdì fin a cene:
a rivavin la sera in cinc o seis, a poavin i cos sul prin pat da li scjali, a vignevin cuntun pas in scjapinela a sentâsi dongja dal fogalâr e a spetavin la cena (Novella Cantarutti, La femina di Marasint);
la sere, prime di cene, dispès a rivavin fin a Spilungje, la borgade plui vicine cu la ostarie, a bevi la verute di sgnape (Pieri Menis, Chei di Muraie);
E cuant tornaiso? E cuant tornaiso par chi? / Doman di sere, prime dal imbrunî (Popolâr, Sul puint di Braulins)
-
ancje in riferiment a altris oris dal dopomisdì:
e veve cjapât il tren par Saint-Denis a cuatri di sere, te Gare du Nord, ma in cjase dal barbe si jere presentade nome la dì dopo, tor misdì (Carlo Sgorlon, Il dolfin)
Sin. dopomisdì
-
ancje in riferiment aes oris dopo cene:
une sere, finît di cenâ, al le fûr, par vie che al jere masse adore par lâ a durmî (Carlo Sgorlon, Prime di sere);
di dì si lavorave e di sere si balave (Alan Brusini, Par stradis lungjis);
in chê sere al stentà a cjapà sium. Mil pinsîrs i passavin pal cjâf (Roberto Ongaro, Il muc)
Sin. gnot
Polirematichis e espressions idiomatichis
Proverbis:
- cuant che il gjal al cjante la matine, la ploie e je vicine; cuant che al cjante la sere, bontimp si spere
- fumate la sere, bontimp si spere; fumate la doman, la sere al è pantan
- il jet no si lu fâs par durmî une sole sere
- l'arc di Sant Marc la sere, bon timp si spere, l'arc di Sant Marc la doman, no ven mai sere che nol sedi pantan
- la ire de sere lassile pe matine
- lis oris de matine a son la mari dai mistîrs, lis oris da la sere a son la mari dai pinsîrs
- mai laudâ il biel dì prin di sere
- nûl lizêr la sere, bon timp si spere
- nûl ros la matine, la ploie e je vicine; nûl ros la sere, bon timp si spere
- ros la sere, bon timp si spere; ros la matine, la ploie e je vicine