sbuliâ  sbu|li|â  [CO]

  1. v.intr. tacâ a fâ bufulis prime di bulî:  al cjapà sù la aghe, il fûc al jere za impiât, e dopo vêle salade al scomençà a butâ la farine cuant che e sbuliave parcè che no fasès grops (Sergio Visentin, Il crot te polente)
    Sin. bulicjâ
  2. v.intr. fâ un sun come di alc che al sta par boli, o fâ un sun sot vie:  alora l’organo che al sbuliava za di un biel piez, al tacava di bot a sunâ di ligria (Anna Bombig, I cuatri altârs dal "Corpus Domini")
  3. v.intr. (fig.) tacâ a imparêsi o imparêsi in maniere no clare, come sot vie:  ca e là par la Europe, massime in Jugoslavie, al stave sbuliant un afâr che nol jere la vuere solite [ma la vuere partigjane] (Francesc Placerean, Cuintristorie dal Friûl dal 1866 fint in dì di vuê); la puisie gnove e sbuliave ancje tes ultimis jevis de Filologjiche (Dino Virgili, Leterature gnove dal Friûl)
  4. v.intr. (fig.) jessi une vore cjalt, scjaldâ a fuart:  al jere tornât il cjalt, la stagjon dai fens: i setôrs a frontavin acanâts il beton de tose tal soreli aviart che al sbuliave su la campagne (Dino Virgili, La massarie)
    Sin. brusâ , scotâ , sbrovâ , sboentâ
  5. v.intr. (fig.) soredut di part dal cuarp vê o dâ une sensazion di cjalt, di inflamazion, di mâl e v.i.:  al mi à dât une piçade tal braç che mi sbuliee ancjimò (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
    Sin. brusâ , buiâ
  6. v.intr. (fig.) interessâ une vore, jessi sintût tant che urgjent:  mi sbuliave di dîi [...] (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
    Sin. premi , buiâ , brusâ
    1. jessi une vore interessât, sintî un grant desideri:  si presentà ca di noaltris un ex socialist che al sbuliave di jentrâ tal Consei regjonâl (Adrian Cescje, Memoriis di politiche linguistiche)
  7. v.intr. jessi presint e movisi in grande cuantitât:  al restave dome il sbuliâ ad in plen di cisics e di stelis (Dino Virgili, La aghe da pît la cleve)
    Sin. 'siminâ