Dizionari de Lenghe Furlane

sâl  sâl  [FO]

1. s.m. sostance solide cristaline, componude di clorûr di sodi, che e da un dai savôrs fondamentâi:  fâ la pastele par omelettes batint i ros dai ûfs cul sâl, la spongje tenare e zontant pôc par volte la farine e il lat fin a vê une paste mulisite (Giorgio Pascoli, Il Litum: jerbis salvadiis te cusine); i fruts a rivavin cjantant imburîts, une bugade di aiar salin, che il sâl dal mâr lu vevin su la piel come une farine (Alan Brusini, Come tai romançs); masse sâl al fâs alçâ la pression e cressi il pericul di malatiis dal cûr e de circolazion (Guglielmo Pitzalis, Mangje san 2)
2. s.m. [TS] chim. compuest che in forme tipiche al ven de reazion di un acit e di une base, pe sostituzion di un o plui jons idrogjen dal acit cun jons metalics o altris cations
3. s.m. [TS] agr. acolt azotât:  si bute une vore di sâi te sperance che e ledi in miôr; ma cussì la tiere si strache, no je plui fertile, e par che e resti fertile si butin simpri plui sâi intun circul viziôs cence fin (Alessio Potocco, Ganzit: il furlan i ten plui ae sô cjase che al so ort)
4. s.m. spec. tal pl., preparât a base di sâi amoniacâi, cu la zonte di essencis di odôrs, doprât par fâ dâ di ca cui che i è vignût imbast
5. s.m. (fig.) in paragons o metaforis par dî incisivitât, fuarce, caratar, identitât e v.i.:  il partît democristian […] che al à juste dade une man a impastâ chê panadute cence sâl che e je la autonomie normâl (Josef Marchet, Di bessôi); al ven fûr il ricuart de nestre vite di prin, il nestri mût di sintî la vite, il nestri mût di vivi, il nestri mût di preâ. I paîs cul sâl di prin, cul savôr di prin (Francesc Placerean, La vite di chest mont, cence un pôc di spirt, e devente brute e insopuartabile)
6. s.m. (fig.) spirt inteligjent e inzegnôs:  e la brigade po restà di stuc, / ce invece di om sapient / e lu crodeve un cuc. / Ma in chel si jeve in pîts un comensâl / e al recite ste strofe che à del sâl (Pieri Çorut, Il tratôr galantom)
   Cfr. spirt , snait , pevar

Polirematichis e espressions idiomatichis

• cence meti sâl parsore loc.av.
• cence meti sâl sore loc.av.
• cence meti sâl sù loc.av.
• disfâsi come il sâl ta la aghe loc.v.
• disfâsi tant che il sâl ta la aghe loc.v.
• lâ come il sâl ta la aghe loc.v.
• sâl di canâl loc.s.m.

Proverbis:

• a spandi sâl a vegnin disgraciis
• amôr cence stime, pan cence sâl
• cui che al è di sâl che nol ledi te ploie
• femine cence gracie pôc e vâl tant che la mignestre cence sâl
• il fen co al è bagnât al lasse il sâl tal prât
• il sâl al cuince e al discuince
• il sâl al sta ben in cusine come pardut
• prin di cognossi ben un, bisugne mangjâ cun lui un stâr di sâl
• prin di cognossi la int di cjase, bisugne mangjâ cun lôr un stâr di sâl
• sore sâl nol è savôr, sore diu nol è signôr