Dizionari de Lenghe Furlane

plache  pla|che  [CO]

1. s.f. toc di materiâl, sedi naturâl che artificiâl, larc e sutîl:  dongje de spuinde, chenti si veve grebans grês e gropolôs, là plachis largjis di cret, che la aghe tal so svuatarâ e lenzeve cun moviments luncs (Agnul di Spere, Int no consumade); viodi a nassi un cjaldîr, ce maravee! / une plache di ram a pôc a pôc / sot i colps dal martiel si stuarç, si plee (Zuan Lurinçon, Un cjaldîr)
   Cfr. lastre¹ , lame , cartele , plote
   
   1. lamine retangolâr di metal che si dopre par meti la robe a cuei tal for:  scjaldâ il for a 150-160 °C e cuant che al è cjalt, meti dentri lis plachis cui biscots e cuei par 25-30' (Sandri Carrozzo, Scottish shortbread); fâ strissulis avonde lungjis di stâ tal for e largjis un pâr di centimetris; poiâlis su la plache e meti tal for a 200 grâts par 25 minûts (Margherita Timeus, Un Nadâl dolç dolç cui piçui scaletîrs)
   2. retangul o altre forme di materiâl dûr picjât in gjenar su la jentrade di un edifici o di un ambient o tun monument, cun denominazions o indicazions
      Sin. targhe
   3. retangul o altre forme di metal o di materiâl di bielece, in gjenar cun iscrizions, dade tant che ricuart o premi:  al autôr de opare che la jurie e sielzarà, i larà un premi di mil e cinccent euros e une plache di arint (Redazion La Patrie dal Friûl, Trente agns dal Premi leterari Sant Simon)
      Sin. targhe
   4. tocut di metal cun scritis, segns e v.i., in gjenar par identificâ cdn.
      Sin. medaie , medaiute , placute
2. s.f. [TS] gjeol. ognidune des grandis parts rigjidis de litosfere:  Afriche e Eurasie si unirin daspò dal moviment de plache arabiche (Claudio Tuniz, Evoluzion umane: la sience e mostre i segrets des nestris origjins)
   Sin. plache litosferiche , plache tetoniche