Dizionari de Lenghe Furlane

pazience  /-è-/  pa|zi|en|ce  [FO]

1. s.f. capacitât di adatâsi sopuartant, di no rabiâsi, di no sustâsi, di spietâ e v.i.:  par rivâ a capî l'argoment, e covente un pocje di pazience e di buine volontât de bande di cui che al lei (Franc Fari, Il cjâf dai furlans); la concuiste de grafie unitarie normalizade dal 1986 mi è costade une fadie infinide di mediazions, di diplomazie e di pazience (Adrian Cescje, Memoriis di politiche linguistiche); no saveve ni lei, ni scrivi parcè che la mestre no veve vût la pazience di insegnâi (Pieri Somede dai Marcs, Nardon e Vigjute di Nani)
   Var. pazienzie
2. s.f. capacitât di fâ lis robis cun calme, cence sacrificâ la precision pe presse:  Pieri al meteve vie ogni robute tal so puest cu la pazience di un oresin (Maria Forte, Il bal spisimât des ombrenis)
   Sin. cure , curie²
3. inter. tant che esortazion, par se stes o par altris, a rassegnâsi, a cjapâ lis robis cence rabiâsi, cence dâur masse impuartance:  pazience! No jere la prime volte che nol cjatave nissun disponût a scoltâlu (Franca Mainardis, Aiar di cjase); ju veve cjapâts [i reumatics] là dentri [in preson], e cumò al scugnive tignîsai fintremai che al viveve. Pazience. Tancj a la sô etât a jerin plui malmetûts di lui (Carlo Sgorlon, Prime di sere)
   Sin. amen¹
4. s.f. [TS] religj. imagjin sacre di picjâ tor dal cuel:  si notin in dutis lis fraternis, a spindin bêçs a comprâsi medaiis, paziencis e coronis di rosari (Josef Marchet, Lis predicjis dal muini); di Pasche e di Nadâl / al fâs la sô confession gjenerâl / cjariât di agnusdei e di paziencis / l'è simpri in zîr a cjapâ sù indulgjencis (Pieri Çorut, Il bon a so mût)
   Sin. abitin
   
   1. toc di cere des cjandelis dal triangul, tignût par devozion e par vê protezion:  parsore la testiere, poiât su la parêt blancje, il cuadri de Madone di Mont un pôc scûr di polvar, parsore un ramaçut di ulîf, e dongje la cjandele benedete cu lis paziencis (Pieri Menis, Sul agâr)
      Sin. triangul
5. s.f. [TS] religj. part dal vistît doprât di cualchi ordin religjôs, massime i Carmelitans, tant che une cuete lungje cence maniis
   
   1. cuarde doprade dai fraris par peâ in vite il gabanot

Polirematichis e espressions idiomatichis

• ma pazience che loc.coniun.
• pazience che loc.coniun.
• pazience se loc.coniun.
• pierdi la pazience loc.v.
• puartâ pazience loc.v.
• scjampâ la pazience loc.v.

Proverbis:

• al marît prudence, a la femine pazience
• cu la pazience il pedoli al à fat il zîr dal mont
• cu la pazience si è maridât un frari e tal doman al è deventât un lari
• cu la pazience si fâs dut
• cu la pazience si maride un frari
• la pazience e je la virtût dal mus
• la pazience e je une grant virtût
• rispiet pai viei, pazience cui mats e sopuartâ lis malis lenghis