madrac
/-àc/
ma|drac
[AF]
-
s.m.
sarpint no velenôs, in particolâr de specie Natrix natrix:
[i rifugjâts] a àn une grande pôre dai madracs. Ogni magnute al è un berli, e al è dibant cjapâle in man e fâi viodi che no je une lipare. Là vie di lôr i sarpints a devin jessi un afâr seri (Igor Londero, Un blanc e un neri);
i madracs cuant che rive Primevere / mudin a un timp istès e scusse e ciere (Pieri Çorut, Il Strolic furlan par l'an 1821)
Sin. bis1
, bisse
Cfr. sarpint
, magne1
, carbon
, incjesine
, lance
, lipare
-
(ancje fig.)
in metaforis o paragons par dî di cdn. che al è trist o che al reagjìs a alc in maniere imburide, rabiose, aggressive e v.i.:
ce vevie di fâ? Lassâ Gurize ai sclâfs? Lassâ i sclâfs dal Scjars sot i talians, une volte che a mostravin di odeâsi tant che madracs? (Josef Marchet, Un sproposit… meretât!)
-
(ancje fig.)
in metaforis o paragons, par dî di alc che al va indevant a volts:
i discors che si podeve sintî, venti sù pal lunc madrac de procession che si rimpinave sù pe cleve, a jerin diviers, a saltavin di pâl in frascje (Roberto Ongaro, Cretevierte)
Sin. magne1
-
s.m.
(fig.)
persone ipocrite, dople, triste:
un paîs plen di canaiatis, di massepassûts, di imbroions, di cjochelis, di galeris, di barabis, di maleducâts, di cjastrons, di madracats , di robate di ogni sete (Josef Marchet, Lis predicjis dal muini)
-
ancje tant che ofese gjeneriche in imprecazions o blestemis:
"Ma cui sono chei chi, sango madrac?" (Stiefin Morat, Donald dal Tiliment)
Polirematichis e espressions idiomatichis
Proverbis:
- cuant che a son fûr madracs e carbons, si è sigûrs di lamps e tons
- il madrac si strissine par tiere
- lis robis lungjis a deventin madracs
- no bisugne tocjâi la code al madrac
- sborf madrac palese
- se si lavore tal carnevâl piçul, si viôt madracs piçui; se si lavore tal carnevâl grant, si viôt madracs grancj