loze1
/lò-/
lo|ze
[AF]
-
s.f.
struture architetoniche devant di un edifici, cuvierte parsore, vierte de bande di fûr e tignude sù di colonis o pilastris:
une grant loze di un palaç di siôrs vierte su di un zardin colm e dut florît di rosis (Pieri Somede dai Marcs, Mame…);
sot de loze dal vecjo municipi a jerin bielis pituris di cinccent agns indaûr (Pieri Menis, Lis leiendis di Buie)
Sin. lobie
, puarti
, sotpuarti
, ludidôr
, lobeâl
-
struture a arcs o spazis vierts de bande difûr o sierâts di barcons, ancje tai plans alts di un edifici
-
s.f.
tes salis teatrâls o cinematografichis, il complès dai puescj che a son parsore de platee:
[il prin teatri di Palme] e jere une grande stanzie dulà che la cavalarie e faseve lis provis, cuntun spazi pai spetacui che al veve di vê une loze, la platee e un palc mobil (Bepi Agostinis, Storie e cronistorie dal teatri in Friûl)
Sin. galarie
, lozon
-
s.f.
grup locâl de massonarie:
Balletti, che come ducj i atôrs francês al jere masson, al veve vût dal sigûr a ce fâ cu la amission di Casanova, che a Parîs al frecuentà la loze dal duche di Clermont, grant mestri di dutis lis lozis francesis dal 1743 al 1771 (Pierluigi Visintin, Friûl e furlans te Histoire de ma vie di Giacomo Casanova)
Sin. lobie
-
s.f.
il tignî o il metisi a stâ, a durmî tun puest, soredut par une dade di timp limitade, e il lûc dulà che si sta e si duar, soredut in loc.v.:
la sere tart o sin rivâts a Bologne. Nus àn dât di loze, in trê stanziutis e une cusinute a miezis, dôs signorinis che timp indaûr o vevin cognossût (Pieri Somede dai Marcs, Sant Simon: 28 di Otubar 1917)
Sin. lozament
, lozo
