Dizionari de Lenghe Furlane

galarie  /-ì-/  ga|la|ri|e  [AF]

1. s.f. passaç sgjavât sot tiere o dentri intune mont, intune culine e v.i.:  chê galarie e leave doi paîs svuizars, al disè l'operari, un a misdì e chel altri a miezegnot des montagnis dal Sant Gotart (Agnul di Spere, Fieste di inaugurazion); i alpins si son metûts a lavorâ sot tiere come farcs: trinceis, cjaminaments, ricovars, galariis (Pieri Menis, Zilugne)
   Sin. trafôr , tunel
2. s.f. passaç cuviert par pedons, pal solit tal centri des citâts cun buteghis e v.i.:  tal 1882 [Andrea Scala] al progjete a Alessandrie di Egjit la galarie cuvierte sul model di chê di Milan, e daspò altris impuartantis oparis (Bepi Agostinis, Storie e cronistorie dal teatri in Friûl); la siorute e steve di fûr de Galarie Bardelli (Walter Tomada, La vergogne des latariis)
3. s.f. puest li che si tegnin oparis artistichis in esposizion:  no si po lâ a Rome cence fâ un salt tal Vatican. Tes galariis e je la plui grande concentrazion di grecitât e romanitât. Buine part des statuis antighis salvadis a son finidis alì (Checo Tam, Rome: la citât eterne)
   
   1. racuelte di oparis artistichis, ancje in denominazions uficiâls:  lis Galariis dal progjet di Udin a proponin une riflession sui mûts di comunicâ e di vivi la architeture di vuê (Erika Adami, I segrets de vite tun zermuei di tiere di cjamp); sul curidôr di cjase al veve une galarie di cuadris e di crous, ducj lavôrs di man sô (Pietro Cella, Idoneo)
   2. (fig.) patrimoni artistic:  midiant di chestis dôs voris, la galarie de musiche furlane si inricjìs di altris innomenâts protagoniscj (Luche Nazzi, Trainis musicâls, fra cramârs e clericât)
4. s.f. (fig.) schirie di personaçs impuartants o ancje di personis in gjenerâl:  o stoi pensant a dute chê galarie di galantoms che a presumin di vê cjapât sù il nestri puest (Angelo Floramo, Un lamp (Belen)); une galarie di personaçs, atuâi o dal passât, che a àn marcade la storie e la culture dal nestri teritori (Redazion La Patrie dal Friûl, Avostanis: chest an ai Colonos "in onôr, in favôr". Si contin lis storiis di personaçs de storie e de culture furlane)
   Sin. rassegne , schirie , rie
5. s.f. tai teatris di struture tradizionâl, il lozon, ta chei modernis e tai cines la rampe di puescj parsore de platee:  [il teatri di Cividât] cuntun cambiament radicâl al ven tornât a fâ dal architet Gilberti cun trê ordins di galariis (Bepi Agostinis, Storie e cronistorie dal teatri in Friûl)
   Sin. lozon
   
   1. il public sentât in galarie:  dute la galarie e bateve lis mans
6. s.f. [TS] arch. tai palaçs, spec. rinassimentâi e barocs, passaç cuviert plui larc di un coridôr, dispès cun sufit a volts, par meti in comunicazion ambients dongje:  il palaç patriarcjâl al ven esaltât soredut pes decorazions de galarie di Zuan Batiste Tiepolo, che il Dionisi lu à volût par prin a Udin (Bepi Agostinis, Storie de art in Friûl)
   
   1. tes glesiis bizantinis e preromanichis, loze cui arcs metude sore des navadis laterâls
   2. tes glesiis romanichis ognidune des seriis di arcadis metudis par decorazion de façade o de abside:  lis nûf statuis de galarie de façade dal domo di Glemone (Bepi Agostinis, Storie de art in Friûl)