Dizionari de Lenghe Furlane

intonazion  /-òn/  in|to|na|zi|on  [CO]

1. s.f. [CO, TS] mus. l'intonâ, l'intonâsi e il lôr risultât, soredut di un strument musicâl o di plui struments musicâi o di plui vôs corâls tra di lôr:  o voi petant cun lui cualchi cjantade / e cuant che vin cjatât la intonazion, / lui di Tebaldo al fâs, jo di Isoline (Pieri Çorut, Il mio cjan)
   
   1. di cdn., il jessi intonât, il cjantâ ben, cui tons juscj
   2. corispondence dai suns cu lis notis segnadis
   3. sun che al ven doprât par acuardâ un strument o i struments di une orchestre
   4. inizi di une esecuzion corâl fat di un strument o di une vôs soliste
   5. mus., st.mus. tacant dal secul XVI, preludi musicâl curt, pal plui par orghin, che al faseve di introduzion a un toc di musiche vocâl sacre
   6. lit. intal cjant liturgjic cristian, primis peraulis di un salm, di une antifone o di un imni, intonadis dal celebrant par stabilî la tonalitât di esecuzion
2. s.f. ling. modulazion des altecis tonâls intal produsi i suns di une lenghe:  la notazion prosodiche si interesse de marcadure de prosodie dal test fevelât cun tant di acent, intonazion, pausis e v.i. (Vladimír Petkevič, trad. di Zorç Cadorin, Corpus linguistics); il talian invezit [par formâ lis domandis] nol dopre la sintassi ma dome une intonazion divierse (Franco Finco, Se tu sâs il furlan tu imparis l’inglês!)
3. s.f. maniere di fevelâ che e pant une cierte espression:  "Ce fasino po?" al sberlà cualchidun suntun cjar di mieç; e al slungjà fûr il cuel a cucâ. Co al lupà la frascje, al saltà jù, mudade intonazion: "Ah, al è ce bevi!" (Dino Virgili, La aghe da pît la cleve); il contignût des peraulis al podeve someâ stiçât, ma no si olmave nissune uce inte intonazion de sô vôs (Raffaele Serafini, Altris contis di famee)
4. s.f. (fig.) caratar di un scrit, di un discors e v.i.:  dutis cançonetis lizeris o periculosis, parcè che dutis di intonazion amorose o erotiche o sensuâl (Antoni Beline, La fabriche dai predis)
   Sin. ande
5. s.f. (fig.) variazion di colôr:  ros e vert. turchin e viole / in milante gradazions; / ogni femine, ogni fiole / à trê cuatri intonazions (Alfonso Deperis, Vivi e lassâ vivi); une raiade di soreli e rive a foropâ il nûl di borascje, fasint slusî tal lôr vert svareât di mil intonazions lis monts (Renzo Balzan, Vitis in Cjargne e misteris tal cûr)
   Sin. tonalitât , gradazion , ton² , at
6. s.f. (fig.) maniere di cumbinâsi di plui elements tra di lôr:  Luisa e sunave: lis spalis e i riçots bionts jù pe schene, i braçs crots, dut il so cuarpesel scarmulin a jerin tune intonazion perfete cul saltuçâ de musiche (Dino Virgili, La aghe da pît la cleve)
   Sin. armonie , cumbinazion