Dizionari de Lenghe Furlane

fiere¹  /-ié-/  fie|re  [FO]

1. s.f. incressite de temperadure dal cuarp tant che reazion di difese cuintri malatiis, infezions, tension e v.i.:  lu dismoveve a cinc a buinore l'infermîr che al vignive a misurâi la fiere (Amedeo Giacomini, Tal ospedâl); e murì tal lunis, brusade di fiere, che e çavariave e e clamave Menut (Maria Forte, Dome la cjampanute di Sant Bortul); nol veve vude une linie di fiere di cuant che al jere al mont (Franca Mainardis, Aiar di cjase); Gjoriu al rivà dongja cjoc di fievra e al si butà sul jet che al sfladava malamintri (Novella Cantarutti, La not di Gjoriu); la fiere e jere lade jù scuasi dal dut (Carlo Sgorlon, Il dolfin)
   Var. fievre , fievare , fievere
   
   1. (pop.) tal pl., malaiar o malatie infetive:  zemeva sora un puor jet una femina, consumada da fievaris, zala, strenta, inclapida, cadaver di vita (Federigo Comelli, Il me paîs); lis fieris, consecuence de malarie che si jere scjadenade soredut a Burano, Marghera e Brondolo, a provocarin in pôc timp cuasi 6000 câs di infermitât (Giovanni Pillinini, Zuan Batiste Cavedalis - Une vite esemplâr)
      Sin. malarie , malaiar , fiere dal aiar , mâl dal palût
2. s.f. (pop.) herpes simplex che al ven sui lavris:  i è sbrocade la fiere; i nestris vecjos a disevin che se al colave il pâl, a lis zovinis ur vignivin fûr i bruscs e a lis vedranis la fiere (Luciano Rocco, La foghere)
3. s.f. (fig.) mût di sintî e di fâ individuâl o sociâl plen di tension, ancje fûr di control, par rivâ a vê alc:  la fiere di ribelion e someave finide, e la rivoluzion dai students indurmidide (Carlo Sgorlon, Ombris tal infinît); la famee di jê e slargjà i braçs ancje a lui, che li al bonave la fiere dai pinsîrs (Maria Forte, Cjase di Dalban); l'à tal cûr la sô fede e l'à par ogni gnarf la fiera di cui che al ûl vinsi (Ugo Pellis, Al mandolâr)
   Sin. bulidure , smanie , sbisie

Polirematichis e espressions idiomatichis

• bati la fiere loc.v.
• fiere tal sanc loc.s.f.

Proverbis:

• a sta dibant e ven la fiere
• fiere continue e cope cjavai
• no ven la fiere in chê dì che si mangje i brugnui
• pal dolôr di cjâf no lasse di vignî la fiere
• se la invidie e fos la fiere, trops di lôr le batarès